वाम गठबन्धनका नेताद्वयको माग, ‘प्रधानमन्त्रीले तत्काल राजीनामा दिनुपर्छ’

ओलीको नेतृत्वमा माघ ७ गतेभित्रै नयाँ सरकार बन्ने दाबी
कान्तिपुर संवाददाता

काठमाडौं — वाम गठबन्धनका नेताद्वयले प्रधानमन्त्री शेरबहादुर देउवाको राजीनामा माग गरेका छन् । रिपोटर्स क्लबमा मंगलबार भएको साक्षात्कारमा नेकपा एमाले र माओवादी केन्द्रका नेताहरुले नैतिकताको आधारमा प्रधानमन्त्रीले राजीनामा दिनुपर्ने बताएका हुन् ।

वाम गठबन्धनका नेताद्वयले प्रधानमन्त्री शेरबहादुर देउवाको राजीनामा माग गरेका छन् ।

रिपोटर्स क्लबमा मंगलबार भएको साक्षात्कारमा नेकपा एमाले र माओवादी केन्द्रका नेताहरुले नैतिकताको आधारमा प्रधानमन्त्रीले राजीनामा दिनुपर्ने बताएका हुन् । माओवादी केन्द्रका नेता एवं पूर्वउपप्रधानमन्त्री टोपबहादुर रायमाझीले वाम गठबन्धनले करिब दुई तिहाई मत प्राप्त गरेकोले प्रधानमन्त्री शेरबहादुर देउवाले नयाँ जनमतको सम्मान गर्दै नैतिकताको आधारमा पनि राजीनामा दिनुपर्ने बताए । उनले अबको उद्देश्य भनेको आर्थिक समृद्धि भएकोले सबै दलबीच सहकार्य, एकता र समझदारी कायम गर्नुपर्ने धारणा राखे ।
राष्ट्रियसभासम्बन्धीको अध्यादेश एकल संक्रमणीय वा बहुमतीय व्यवस्थाभन्दा पनि बीचको बाटोबाट अघि बढाउनुपर्ने सुझाव नेता रायमाझीको सुझाव छ । उनले भने, ‘एकल वा बहुमतीयभन्दा पनि अब समझदारीबाट यसलाई टुंगो लगाउनुपर्छ ।’
यसैगरी, एमालेका युवानेता महेश बस्नेतले प्रधानमन्त्री शेरबहादुर देउवाले तत्काल राजीनामा दिनुपर्ने माग गरे । ‘अब पनि उहाँ सरकारमा बसिरहने होइन, तत्काल राजीनामा दिनुपर्छ, जे निर्णय गर्ने हो ताजा मतप्राप्त गरेकाहरुले गर्ने हो’, उनले भने, ‘जनताको चाहना भनेको राजनीतिक स्थिरता र विकास हो, अहिले त्यो दिशातर्फ उन्मुख रहेको वाम गठबन्धनलाई कसरी चलखेल गर्न सकिन्छ भनेर खेल खेल्न खोजेको आभाष भइरहेको छ, राजनीतिक तोडमोडको खेल खेल्नु हुँदैन ।’
कांग्रेसलाई अरुको घरमा खेल्नुभन्दा पनि आफ्नो कमजोरीको बारेमा छलफल गर्न सुझाव उनले दिए । नेता बस्नेतले एमाले अध्यक्ष केपी ओलीको नेतृत्वमा माघ ७ गतेभित्रै नयाँ सरकार बन्ने दाबी समेत गरेका छन् ।
उनले सरकारले राष्ट्रपतिसमक्ष पेस गरेको राष्ट्रियसभासम्बन्धीको अध्यादेश जनमतविपरीत भएकोले अहिले अध्यादेश पेस गर्ने दलसाग बहुमत नभएको जिकिर गरे । उनले भने, ‘एकल वा बहुमतीय के भन्नेबारे विवाद छ, हुन त मुलुक यतिबेला विधिले भन्दा पनि समझदारीले चल्दै आएको छ, यसमा कांग्रेसले धेरै बखेडा नगर्दा नै राम्रो हुन्छ ।’

Yamaha

प्रकाशित : पुस ४, २०७४ १७:३६
ADVERTISEMENT
प्रतिक्रिया
पठाउनुहोस्
ADVERTISEMENT

कुवेतको नेशनल खराफीका २ सय नेपाली कामदारको खाना बन्द

होम कार्की

काठमाडौं — पारिवारिक विवादले धरासयी बनेको कुवेतको ठूलो कम्पनी खराफी नेशनलमा कामविहीन भएर बसेका झन्डै दुई सय नेपाली कामदारको खाना सोमबार बिहानदेखि पुन: बन्द भएको छ । त्यस कम्पनीमा भारतीय, फिलिपिनोसहित झन्डै चार हजार कामदार समस्यामा परेका छन् ।

खाना खुवाउँदै आएको कम्पनीले नेशनल कम्पनीबाट भुक्तानी नभएको भन्दै खाना दिन छाडेको हो । तीन साताअघि पनि खाना दिन छाडेको थियो । तर, नेपाली दूतावासको पहल गरेपछि कम्पनीले फेरि अलपत्र नेपाली कामदारलाई खाना खुवाउन थालेको थियो । ‘कामदारले खाना नपाएको भन्दै दूतावासलाई जानकारी दिएका छन्,’ कुवेतका लागि नेपाली राजदूत यज्ञबहादुर हमालले कान्तिपुरलाई भने, ‘हामीले कम्पनीका व्यवस्थापनसमक्ष कुरा राखिसकेका छौं । उनीहरुले कामदारलाई प्याकेटमा भए पनि खाना खुवाउने जानकारी दिएका छन् ।’

कम्पनीले तलब र काम दिन नसकेपछि ती कामदारहरु सुलेविया क्याम्पमा अलपत्र अवस्थामा छन् । त्यस कम्पनीमा आठ महिनासम्म तलब नपाउने र आवासीय भिसाको म्याद समाप्त भइसकेका कामदारहरु छन् ।

झन्डै दुई सय कामदारमध्ये ९४ जना उद्धारका लागि दूतावासको सम्पर्कमा छन् । २० जनाको उद्धार भइसकेको छ । दूतावासले टिकट र जरिवाना तिर्ने रकम भएपछि मात्रै बाँकी कामदारको उद्धार हुन सक्ने बताउँदै आएको छ ।

प्रकाशित : पुस ४, २०७४ १७:२९
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT