मुखैले लेखेर एसईई [फोटोफिचर]

विमल खतिवडा

चितवन — चितवनको रत्ननगर नगरपालिका १६ स्थित खैरेटीका २० वर्षीय भरत गुरुङ मुखले लेखेर एसईई परीक्षा दिन ब्यस्त छन् । भद्रकाली माध्यमिक विद्यालयमा अध्ययन गरेका उनको परीक्षा केन्द्र जनजागृति माध्यमिक विद्यालय पिठूवा हो ।

एसईई परीक्षा सुरु भएदेखि आमा चन्द्रमायाले छिमेकीसँग सहयोग मागेर परीक्षा केन्द्र पुर्‍याउँछिन् । भरतको हात खुट्टा चल्दैन । बोल्न मात्र सक्ने उनले मुखले नै लेख्न सिके । जन्मजात अपाङ्ग उनलाई भाई सुजनले पढेको देखेपछि पढ्न मन लाग्यो ।

हात र खुट्टाले लेख्न नमिलेपछि उनले मुखले लेख्न सिके । अहिले हात सुकेकाले खाना ठिक्क पारिदिएपछि आफैं खान्छन ।

घर गोरखा घ्याम्पेसाल देउराली हो । बाबुले अर्कै बिहे गरे । त्यही भएर उनी अहिले आमासँगै मामा घर बसेका छन् । भाई सुजन काठमाडौंमा प्लसटु पढ्दैछन् ।

उनलाई एसईई पास भएपछि उच्च शिक्षामा लेखा विषय लिएर पढ्न मन छ । भरतपुर अस्पतालमा जन्मिएका उनको सुरुमा दाहिने खुट्टा ठाडो भयो । बनेपामा पुगेर उपचार गरियो । पछि पछि चिकित्सकले हिंड्न सक्ने भनेपनि उनी हिंड्न सक्दैनन् । हातका औंला सुकेका छन् । सामान्यरुपमा हातको औंला चलाएर डटपेन सम्म समाउन सक्छन । नत्र कितावको पाना पल्टाउनेदेखि पानी पीउन सम्म मुखकै भर पर्नुपर्ने बाध्यता छ ।

उनले परीक्षा दिने साथी खोजेनन । साथीहरुको पढाई बिग्रने डरले उनी आफैंले परिक्षा दिन तयार भए । विद्यालयका केन्द्राध्यक्ष विनोदप्रसाद अधिकारीले उनलाई नियमित समय भन्दा डेढ घण्टा बढी समयको ब्यवस्था गरिएको बताए । परीक्षामा आवश्यक पर्दा उनी मुखैले क्यालकुलेटर, स्केल चलाउँछन् ।

प्रकाशित : चैत्र ७, २०७३ १५:५८
प्रतिक्रिया
पठाउनुहोस्

यसरी बन्दैछ नेपालकै ठूलो कभर्ड हल

राजु घिसिङ

काठमाडौं — पोखरा बहुउद्देश्यीय कभर्ड हल निर्माण कार्य अन्तिम चरणमा पुगेको छ । तर, २०७४ असार मसान्तभित्रै निर्माण पूरा गर्न भने अझै निश्चित छैन । देशकै सबभन्दा ठूलो (३५ हजार वर्गफिट) कभर्ड हल दुई बर्षे योजनासहित २०७०/७१ मा निर्माण कार्य थालिएको थियो ।

पोखरा बहुउद्देश्यीय कभर्ड हल निर्माण कार्य अन्तिम चरणमा पुगेको छ । तर, २०७४ असार मसान्तभित्रै निर्माण पूरा गर्ने भने अझै निश्चित छैन ।

देशकै सबभन्दा ठूलो (३५ हजार वर्गफिट) कभर्ड हल दुई बर्षे योजनासहित २०७०/७१ मा निर्माण कार्य थालिएको थियो । त्यसअनुसार २०७३ असारमा निर्माण पूरा हुनुपर्ने थियो । तर, ठेकेदार कम्पनी डाँफे मुन्ना एन्ड आचार्य प्रतिष्ठा प्रालिले २०७२ वैशाखको महाभूकम्प र त्यसपछि भएको नाकाबन्दीको असर परेको भन्दै निर्माण अवधि लम्ब्याएको थियो ।

पश्चिमाञ्चल क्षेत्रीय खेलकुद विकास समितिका अध्यक्ष खगराज पौडेलका अनुसार छाना हाल्ने, सिट राख्ने, पार्केटिङ र रंगरोगन गर्ने तथा झ्याल–ढोका राख्नेलगायत अन्तिम चरणको काम बाँकी छ । ‘अहिले ठेकेदार कम्पनीले दैनिक ८–१० मजदूरलाई मात्र निर्माण कार्यमा खटाइरहेका छन् । त्यसैले २०७३/७४ मा पनि कभर्ड हल पूरा हुन मुश्किल छ,’ उनले भने, ‘पर्याप्त मजदूर खटाउने हो भने मात्र असार मसान्तसम्म पूरा हुनसक्छ ।’

१३ औं दक्षिण एसियाली खेलकुद (साग) नेपालले सन् २०१९ मार्चमा आयोजना गर्ने निर्णय भइसकेको छ । त्यसैको लागि पूर्वाधार निर्माणअन्तर्गत चार हजार ५ सय दर्शक क्षमताको पोखरा बहुउद्देश्यीय कभर्ड हलको काम अघि बढेको हो । यसको कुल लागत १४ करोड ३० लाख रुपैयाँ रहेको छ ।

‘यसको निर्माण पूरा भएपछि खेलकुदको अन्तर्राष्ट्रिय प्रतियोगिता पोखरामा आयोजना गर्न सकिन्छ । त्यसले खेल पर्यटन विकासमा ठूलो फाइदा पुर्‍याउनेछ,’ अध्यक्ष पौडेलले भने । कराते, तेक्वान्दो, बक्सिङ, भलिबल, बास्केटबल, ह्यान्डबललगायत इन्डोर खेलका प्रशिक्षण र प्रतियोगिता सञ्चालन गर्नका लागि कभर्ड हल बनाइन्छ ।

प्रकाशित : चैत्र ७, २०७३ १५:५८
पूरा पढ्नुहोस्
प्रतिक्रिया
पठाउनुहोस्