पहेँलपुर धानले ढाकेको रामपुर (फोटोफिचर)

कुम्भराज राई

रामपुर (ओखलढुंगा) — मधेसमा धान पाकेको दृश्य आकर्षक हुन्छन् । ठूलाठूला फाँटमा क्षितिजसम्म देखिने धानका खेतहरुको दृश्य जो कोहीलाई मनपर्छ । तर पहाडी भूभागमा भने फरक किसिमका दृश्य भेटिन्छन् ।

प्राय सानासाना खेतका गराहरुमा धान रोपिन्छ । धेरै ठूलो फाँटहरु पाइन्न । साना खेतका फोक्टाहरु चित्र कोरेझैं देखिन्छन् । तर यहाँको मोलुङ गाउँपालिका २ मा पर्ने रामपुर फाँट भने अन्तका फाँट भन्दा केही ठूलो छ । रामपुर धान उत्पादनका जिल्लाकै चर्चित टार हो ।

बिहिबार रामपुर फाँटलाई फरक फरक स्थानबाट हेर्दा सुनौलो देखियो । धान पाकेर पहेंलै भएकोले रामपुर फाँट आकर्षक देखिए । धमाधम धान पाक्न थालेकोले भर्खरै किसानहरु खेतमा निस्कन थालेका छन् । ढिला वर्षा भएको कारण धान राम्रोसँग पाक्न अझै केही समय लाग्ने स्थानीयको भनाई छ ।

‘ठ्याक्कै भोट हाल्ने मिति (मंसिर १०) तिर चाँही धान धमाधम काट्ने बेला हुन्छ ।’ स्थानीय भेषनाथ दाहालले भने, ‘रोप्ने बेला (असार १४) मा पनि चुनाव, अहिले धान काट्ने बेला पनि चुनाव । यसपाली चुनावले कृषकलाई मार परेको छ ।’

सयौं रोपनी क्षेत्रफलमा फैलिएको रामपुरमा रोपनीको ४ लाख सम्ममा खेत किनबेच हुनेगर्छ । एक रोपनीमा ४ मुरीसम्म धान फल्ने स्थानीय सरोज भुजेलले बताए । एक सिजन मात्र धान फल्छ । त्यसपछि यी खेतहरुमा मकै र तोरी उत्पादन हुनेगर्छ ।

तस्बीरहरु: कुम्भराज राई/कान्तिपुर

प्रकाशित : कार्तिक २३, २०७४ १३:५९
प्रतिक्रिया
पठाउनुहोस्

प्रदेश १ को राजधानी कहाँ ? यस्ता छन् उम्मेदवारको चुनावी मुद्दा

लीलावल्लभ घिमिरे

विराटनगर — यतिबेला प्रादेशिक राजधानी बनाउने विषयलाई दुवै सभाका उम्मेदवारहरुले आफ्नो प्रमुख मुद्दा बनाएका छन् । मोरङ, सुनसरी र धनकुटा जिल्लामा प्रतिनिधिसभा र प्रदेसभा सदस्यका उम्मेदवारहरुले प्रादेशिक राजधानीलाई आफ््नो प्रमुख चुनावी मुद्दा बनाएका हुन् ।

सहरी क्षेत्रमा मतदाता बढी भएकाले यो मुद्दा विकाउ हुने उनीहरुको अनुमान छ । 

मोरङ ४ का प्रतिनिधिसभा सदस्यका उम्मेदवार कांग्रेस केन्द्रीय सदस्य महेश आचार्य प्रदेश १ को राजधानी विराटनगर हुनेमा विश्वास गर्न मतदाताहरुलाई सम्झाउँछन् । ‘प्रदेशको राजधाननीका लागि विराटनगरको विकल्प छैन । यो राजनीतिको केन्द्रविन्दू हो’ उनले भने, ‘प्रादेशिक राजधानी यहीं हुन्छ । प्रदेशसभाका लागि महानगरले अहिले जग्गा खरिद र भवन निर्माणका लागि प्रकृया अघि बढाइसकेको छ ।’ 

यही क्षेत्रमा बाम गठबन्धनको तर्फवाट उम्मेदवार बनेका माओवादी केन्द्रका नेता अमनलाल मोदी आफ्नो पहिलो चुनावी मुद्दा प्रादेशिक राजधानी नै भएको बताउँछन् । मोरङ ५ का उम्मेदवार कांग्रेसका केन्द्रीय सदस्य अमृत अर्यालको चुनावी मुद्दा पनि राजधानीको छ ।

अर्का उम्मेदवार विना विभागीय मन्त्री माओवादी नेता शिवकुमार मण्डल विराटनगर देशकै दोस्रो सहर भएकाले राजधानी बन्नबाट कसैले नरोक्ने दाबी गर्छन् । ‘उच्च अदालत बसिसकेको छ,’ उनले भने, ‘यो पनि एउटा आधार हो ।’ ५ कै ‘ख’ बाट प्रदेशसभा सदस्यमा गठबन्धनको तर्फवाट उम्मेदवार बनेका सुमान मियाँको चुनावी मुद्दा पनि राजधानीकै छ । 

मोरङ ६ का अर्का उम्मेदवार कांग्रेस केन्द्रीय सदस्य शेखर कोइराला विराटनगर राजधानी बनाउने कुरा अहिलेको चुनावी मद्दा मात्र नभइ आफ्नो पुरानो एजेण्डा भएको बताउँछन् । ‘प्रदेशको राजधानी यही उपयुक्त छ,’ उनले भने, ‘पूर्वाधारलगायतका सवै सुविधा विराटनगरमा नै छन् ।’

यही क्षेत्रका अर्का उम्मेदवार एमाले नेता लालबाबु पण्डित विराटनगरलाई मेट्रोसिटीको रुपमा विकास गरी राजधानी बनाउनुपर्ने कुरा मतदातामाझ राख्छन् । विराटनगर महानगरपालिका भित्र मोरङका क्षेत्र ४, ५ र ६ नम्बर पर्छन् । मोरङ क्षेत्र नम्बर २ वाट उम्मेदवार बनेका कांग्रेस केन्द्रीय सदस्य मिनेन्द्र रिजालको चुनावी मुद्दामा समेत प्रवेशिक राजधानीको छ ।

सुनसरी १ का उम्मेदवारहरु भने धरानलाई प्रादेशिक राजधानी बनाउनुपर्ने मुद्दाका साथ मतदाताहरुसँग जाने गरेका छन् । ऐतिहासिकतालाई हेरेर धरानलाई राजधानी वनाउनुपर्ने उनीहरुको भनाइ छ ।  लोकतान्त्रिक गठबन्धनको तर्फबाट सुनसरी १ मा उम्मेदवार बनेका संघीय समाजवादी फोरम नेपालका नेता असोक राई, बाम गठबन्धनबाट उम्मेदवार बनेका एमालेका जयकुमार राईको चुनावी मुद्दा पनि धरानलाई राजधानी बनाउने छ ।

तर सुनसरीकै २ का उम्मेदवारहरु भने इटहरीलाई राजधानी बनाउनुपर्ने नारा दिइरहेका छन् । भौगोलिक दृष्टिकोणले इटहरी सबैको बीचमा पर्ने र पूर्वाधारसमेत रहेकाले राजधानी हुनुपर्ने उनीहरुको भनाइ छ । 

प्रतिनिधिसभा सदस्यका कांग्रेसका उम्मेदवार सीताराम मेहता वाम गठबन्धनको तर्फबाट माओवादी केन्द्रका डम्बर सुवेदीको चुनावी मुद्दा इटहरीलाई राजधानी बनाउने छ । यही क्षेत्रमा प्रदेशसभा (क) कांग्रेसको तर्फवाट उम्मेदवार बनेका हेमकर्ण पौडेलको प्रमुख चुनावी मुद्वापनि इटहरी राजधानी नै हो । 

प्रादेशिक राजधानीका लागि सबैभन्दा बढी आन्दोलन गर्ने धनकुटा जिल्लाका सवै उम्मेदवारहरुको प्रमुख चुनावी मुद्दापनि उही हो । बाम गठबन्धनबाट उम्मेदवार भएका एमालेका अध्यक्ष राजेन्द्र राईदेखि लोकतान्त्रिक गठबन्धनको तर्फबाट प्रतिनिधिसभा सदस्यका उम्मेदवार उद्योगमन्त्री सुनिलबहादुर थापाको पहिलो चुनावी मुद्दा धनकुटालाई प्रदेशिक राजधानी बनाउने नै छ ।

राणाकालदेखि प्रसाशनिक अड्डा भएकाले धनकुटा नै राजधानी हुनुपर्ने उनीहरुको भनाई छ । उम्मेदवारहरुले धनकुटालाई राजधानी बनाउनका लागि मत दिन मतदाताहरुसँग आग्रह गर्ने गरेका छन् ।

प्रकाशित : कार्तिक २३, २०७४ १३:५९
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT