भीरबाट लडेर मृत्यु

छोटकरी

रुकुम (कास)– भीरबाट लडेर एक महिलाको मृत्यु भएको छ। चौरजहारी नगरपालिका १२ मैनेरीकी ३९ वर्षीया सरीकुमारी खत्री घाँस काट्ने क्रममा लडेकी हुन्।

 

खत्री आइतबार बिहान ७ बजे स्थानीय झाँक्रीखोला भीरमा घाँस काट्न गएकी थिइन्। उनको घटनास्थलमै मृत्यु भएको प्रहरीले जनाएको छ। 

सामुदायिक वनमा आगो
सल्यान (कास)– बन्गाड कुपिन्डे नगरपालिका ६ मा रहेको साउने सामुदायिक वनमा लागेको डढेलोले ५ हेक्टर जंगल नष्ट भएको छ। डढेलोले बस्ती भेटाउन थालेपछि स्थानीयलाई निभाउन हम्मेहम्मे परेको थियो। सुर्खेत सहरेबाट विवाहमा गएको टोलीले चुरोट खाएर फालेको ठुटाबाट आगो सल्केको स्थानीय रामबहादुर सिंहले बताए। जंगल क्षेत्र धेरै भिरालो भएकाले डढेलो नियन्त्रणमा लिन कठिन भएको थियो। ‘डढेलोका कारण ठूला रूखसमेत नष्ट भएका छन्,’ उनले भने, ‘जंगली जनावर मरेका छन्।’ सामुदायिक वनका अध्यक्ष रामबहादुर बस्नेतले प्रहरी र स्थानीयको प्रयासमा आगो नियन्त्रणमा लिन सकेको बताए।

 

विद्युत् सर्ट हुँदा आगलागी 
नेपालगन्ज (कास)– खजुरा गाउँपालिका ८ रनियापुरमा विद्युत् सर्ट भई आगलागी हुँदा स्थानीय छवन खाँका दुई घर जलेर नष्ट भएको छ। प्रहरीका अनुसार आइतबार दिउँसो खाँको खरले छाएको घरमा आगो फैलिएको थियो। नियन्त्रण प्रयास सफल नभएपछि नजिकैको जस्ताले छाएको घरमा पनि आगोले क्षति गरेको छ। दुवै घरभित्रका अन्नपात, लत्ताकपडा र अन्य सामग्री नष्ट भएको प्रहरीले जनाएको छ। 

प्रकाशित : वैशाख २५, २०७४ १०:०५
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

गुलरिया–नेपालगन्ज सडक ४ लेन हुने

कान्तिपुर संवाददाता

गुलरिया — दैनिक सयभन्दा बढी सवारी आउजाउ गर्ने गुलरिया–नेपालगन्ज खण्डलाई ४ लेन बनाउन लागिएको छ। यसका लागि गुलरियादेखि भादा पुलसम्म करिब डेढ किमि सर्भे भइसकेको प्राविधिकले बताए।

बाँकेको नेपालगन्ज–खजुरा खण्ड पनि सर्भे भई टेन्डर प्रक्रियामा गएको डिभिजन सडक कार्यालय नेपालगन्जले जनाएको छ।

गुलरिया र खजुरा खण्ड एकैपटक निर्माण हुने डिभिजनले जनाएको छ। चालु वर्षमा करिब ३ किमि सडक ४ लेन बनाउनका लागि ३३ करोड रुपैयाँ निकासा भइसकेको छ। डिभिजन प्रमुख अर्जुन बमका अनुसार राजनीतिक दलको सहमतिअनुसार जिल्ला प्रहरीदेखि अति व्यस्त मानिएको भादा पुलसम्म पहिलो चरणमा सडक स्तरोन्नति गरिनेछ। एक किमि सडक निर्माणका लागि झन्डै ९ करोड रुपैयाँ लाग्ने अनुमान रहेको बमले बताए। उक्त रकम विद्युत्, टेलिफोनका पोल र खानेपानीका पाइप सार्नेदेखि सहरी क्षेत्रमा पर्ने सडकको दाया–बायाँ नाली बनाउनेमा खर्च हुनेछ। चार लेन सडकका लागि हाललाई २४ मिटर चौडा मापदण्ड तोकिएको छ।
गुलरिया–नेपालगन्ज खण्ड ३६ किलोमिटर दूरीको छ। बजेट निकासाअनुसार चार लेनको काम अघि बढदै जाने सडकका प्राविधिकको भनाइ छ। जिल्ला प्रहरीदेखि चाइना लङ फुडसम्म सडक विस्तार हुँदा २४ मिटर फराकिलो हुने डिभिजन कार्यालयले जनाएको छ। यस क्रममा दर्जनौं घर सार्नुपर्ने अवस्था आउने कार्यालयले जनाएको छ। ०४६ मा सञ्चालन भएको सडक ०५३ मा साढे ३ मिटर चौडा कालोपत्रे भएको थियो। सडक साँघुरो बन्दै गएपछि ०६६ मा साढे ५ मिटर चौडा बनाई कालोपत्रे गरिएको थियो।
 दैनिक सवारी चापले सडकमा आउजाउ गर्न समस्या भइरहेको समय चार लेनको निर्माण हुने भएपछि दुर्घटना न्यूनीकरण हुने स्थानीयको विश्वास छ। सडक डिभिजनले अतिक्रमण गरी निर्माण गरेका घर भत्काउन थालेको जनाएको छ। डिभिजन प्रमुख बमले यसै क्रममा बाँके र बर्दियामा अतिक्रमण गरिएका संरचना हटाउने अभियान थालिएको जनाए। सडक विस्तारपछि दैनिक यातायातका साधन आउजाउमा सजिलो हुने र अनावश्यक सास्ती नहुने स्थानीयको भनाइ छ।

प्रकाशित : वैशाख २५, २०७४ १०:०५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT