यार्सा टिप्दाटिप्दै दुईको मृत्यु

अपी हिमाल गाउँपालिकाको रोखापु दुलेमा यार्सागुम्बा संकलन गर्दा बैतडी पुच्यौडी नगरपालिका–३ चनलपानीका ४८ वर्षीय धौलसिंह बोहरा हिमपहिरोमा च्यापिएका थिए । उनको घटनास्थलमै मृत्यु भएको खण्डेश्वरी प्रहरी चौकीले जनाएको छ ।
बोहरासँगै रहेका २१ वर्षीय जनकसिंह धामी घाइते छन् । उनलाई उपचारका लागि गोकुलेश्वर अस्पताल ल्याइएको छ । मृतक बोहराको शुक्रबार लेकमै अन्त्येष्टि गरिएको जिल्ला प्रहरी, दार्चुलाले जनाएको छ ।
बिहीबारै यार्सागुम्बा संकलनको क्रममा अपी हिमाल गाउँपालिका वडा नम्बर १ सिप्तीकी १४ वर्षीया अरुणा जागरीको बयली भीरबाट चिप्लिएर खस्दा मृत्यु भएको स्थानीयले बताएका छन् । लेकमा फोन सम्पर्क नहुँदा घटना शुक्रबार मात्र जानकारीमा आएको खण्डेश्वरी प्रहरी चौकीका असई नरेन्द्रबहादुर रोकायाले बताए । यससँगै यार्सागुम्बा संकलन गर्ने क्रममा यस वर्ष विभिन्न लेकमा गरी तीन जनाले ज्यान गुमाएका छन् ।