अस्पताल अघिल्तिरै जिप डुब्यो

प्रसव बेथा लागेकीसहित परिवारका सबै ६ जनाको मृत्यु
भरतपुर ब्युरो

रौतहटको परोहा गाउँपालिका–३ की गर्भवती शर्मिला यादवलाई प्रसव बेथाले च्यापेपछि आइतबार बिहान सुत्केरी गराउन अस्पताल लैजाने क्रममा जिप डुबेपछि उनीसहित परिवारका ६ जनाको मृत्यु भएको छ ।

जिप चालक र अर्का एक व्यक्ति भने पौडिएर बच्न सफल भएका छन् । शर्मिला, उनका पति चन्दनकिशोर, ३ वर्षीया छोरी छोटीकुमार, शर्मिलाकी आमा ५४ वर्षीया सुमित्रादेवी, काकी ३८ वर्षीया ललिता र भाइ २५ वर्षीय सरोज यादवको मृत्यु भएको हो ।
चालक शम्भु यादवले बाढीमा अनुमानका आधारमा सडक ठानेर जिप चलाइरहँदा नहरमा खस्न पुगेको बताएका छन् । जिल्ला प्रहरी प्रमुख एसपी यज्ञविनोद पोख्रेलका अनुसार अस्पताल पुग्न सय मिटर मात्रै बाँकी छँदा उनीहरू चढेको बीएच२६एवाई १९३९ नम्बरको भारतीय जिप नहरमा खसेको थियो । स्थानीय र प्रहरीले उनीहरूको शव घटनास्थलबाट बाहिर निकालेका थिए । बाढीले जिल्लाभर ६ देखि ८ फिटसम्म पानी जमेको छ । डुबानकै कारण प्रमुख जिल्ला अधिकारीलगायत सुरक्षा निकायका प्रमुख आइतबार पनि घटनास्थल पुग्न सकेनन् ।
पीडितले शव बुझेर घरमा लगेका छन् । परिवारमा रुवाबासी चलेको छ । परिवारका सबैको मृत्यु भएपछि बस्तीमा शोक छाएको छ । एकातिर बाढीले बिचल्ली छ, अर्कोतर्फ आफन्त र छिमेकी गुमाएपछि गाउँमा चुलो बलेको छैन । स्थानीयले जताततै पानी जमेकाले अन्तिम संस्कार गर्नसमेत समस्या परेको बताए । डुबानका कारण एक बस्तीबाट अर्कोमा पुग्न सकिएको छैन । जिल्लामा बिजुली र टेलिफोन सेवा अवरुद्ध छ । पीडितले आइतबार साँझसम्म पनि राहत पाउन सकेका छैनन् ।

Yamaha

एसपी पोख्रेलका अनुसार बाढीले बगाएर देवाही–२ की ६५ वर्षीया जोगिया देवी, दुर्गा भगवती–६ की ४० वर्षीया कोशिला देवी र ईशनाथ–९ का १४ वर्षीय सकिल देवानको पनि मृत्यु भएको छ । विभिन्न खोलाले बगाएर आइतबार रौतहट राजपुर–३ का मताज खान र अन्य पाँच जना बेपत्ता रहेको प्रहरीले जनाएको छ । देवाही र गुजरामा पनि एक/एक जना बगेर बेपत्ता भएका छन् । उनीहरूको साँझसम्म पत्तो लागेको छैन ।

परिवारै पहिरोमा
मकवानपुरमा बाढी र पहिरोमा परेर ५ जनाको ज्यान गएको छ भने एकै परिवारका ६ बेपत्ता छन् ।
बकैया गाउँपालिका–१० मा आइतबार बिहान पहिरोले मंगलसिंह न्यासुरको घर पुर्दा उनी, पत्नी, ४ छोरी र १ छोरासहित ७ जना पुरिएका हुन् । पहिरो पन्छाएर खोज्ने क्रममा ७ वर्षीया पाल्मको मात्र शव फेला परेको छ । अन्य ६ जना बेपत्ता छन् । घरमा सबै जना सुतिरहेको अवस्थामा बिहान ४ बजे पहिरोले घर पुरेको प्रहरी उपरीक्षक विकासराज खनालले बताए । ५० वर्षीय मंगलसिंह, ४५ वर्षीया सुनमाया, १० वर्षीया हिरा, ८ वर्षीया सानु र २ वर्षीय विकास बेपत्ता छन ।
यस्तै बकैया–१ धियालकी ३२ वर्षीया सुनमाया मोक्तान, बकैया–६ छतिवनका ४० वर्षीय वीरबहादुर मोक्तान र हेटौंडा उपमहानगर–१३ का २५ वर्षीय ज्ञानबहादुर हिमडुङको पनि बगेर मृत्यु भएको छ । पहिरोले घर पुर्दा भीमफेदी–८ इपापाखा टोलकी ५० वर्षीया मिठुमाया दानीको ज्यान गएको छ ।

५ को मृत्यु, ३ बेपत्ता
चितवनमा आइतबार बाढीले तीनको ज्यान लिएको छ । राप्ती नगरपालिका–८ स्थित पम्फा खोलाको बाढीले बगाएर स्थानीय गुमनकुमारी रानामगरको मृत्यु भएको हो । त्यस्तै राप्ती–४ का फूलमती प्रजाको घर ढलेर ज्यान गएको छ । उनका अनुसार बिहान इच्छा कामना गाउँपालिका–३ कोरेकका कमलबहादुर चेपाङ बारबाङ खोलामा आएको बाढीले बगाएर मृत्यु भएको हो । राप्ती नगरपालिकाका ५५ वर्षीय रणबहादुर चेपाङ बाढीमा परी बेपत्ता भएका छन् । चितवनको राप्ती र केरुङ नदीमा आएको बाढीले डुबानमा पारेपछि भरतपुर–२३ स्थित जगतपुरको बलहठ्ठामा रहेको आशा अनाथालयमा फसेका २ सय ५० बालबालिकालाई नेपाली सेनाको हेलिकप्टरले उद्धार गरेको छ । यस्तै बाराको पसाहा खोलाको बाढीमा डुबेर महागढीमाई–१ बरियारपुरका १२ वर्षीय मैफुज मियाँको मृत्यु भएको छ । उनीसँगै रहेका ११ वर्षीय (नजिर हुसेनका छोरा) सरफाज हुसेनलाई स्थानीयले उद्धार गरेका थिए । सर्लाहीमा लखनदेही नदीले बगाउँदा बरहथवा नगरपालिका–१६ की १७ वर्षीया रुनुकुमार मण्डलको मृत्यु भएको छ । बाढीले पर्सामा २ जनालाई बगाएर बेपत्ता बनाएको प्रहरीले जनाएको छ । जगरनाथपुर–१ पिपडारीकी ५५ वर्षीया बुनी महतो र पकाहामैनपुर गाउँपालिका–५ खेस्राहामा भारत बेतियाका ५५ वर्षीय रामस्वरूप माझीलाई बाढीले बगाएको हो ।
(शिव पुरी/पवन यादव/प्रताप विष्ट)

Esewa Pasal

प्रकाशित : श्रावण ३०, २०७४ ०६:३०
ADVERTISEMENT
प्रतिक्रिया
पठाउनुहोस्
ADVERTISEMENT

बाढीले छोपियो पश्चिम तराई

-पाँचको मृत्यु
-राजमार्ग, पुल र घर बगे
-सयौं बस्ती डुबानमा
भरतपुर ब्युरो

भरतपुर — अविरल वर्षाका कारण मध्य तथा पश्चिम तराईको जनजीवन दुई दिनयता कष्टकर बनेको छ । बाढी–पहिरोमा शनिबार साँझसम्म ५ जनाको ज्यान गएको छ । अत्यावश्यक पूर्वाधार भत्किनुका साथै बगेका छन् ।

तराईका जिल्ला जलमग्न छन् । घर र बाली डुबेका छन् । पहाडमा पहिरो र उर्लंदो खहरेले कटान गर्दै छ । नवलपरासीको दाउन्नेमा पूर्व–पश्चिम राजमार्ग बगेपछि आवतजावत ठप्प छ । 

सर्लाहीका दर्जनौं बस्ती डुबेका छन् । बाढी पसेर घर भत्किँदा र खोलाले बगाएर शनिबार दुई जनाको मृत्यु भएको छ । धनकौल गाउँपालिका १ मानपुरकी ७५ वर्षीया किशोरी रायलाई घरले थिचेर ज्यान गएको हो । त्यस्तै बरहथवा नपा–१० सीतापुरका १७ वर्षीय राकेशकुमार साहलाई सोती खोलाले बगाएको प्रहरीले जनाएको छ । अपराह्न वाग्मती नदीले बगाएर ल्याएको एक शव फेला परेको छ । मृतकको सनाखत हुन नसकेको प्रहरीले जनायो । पानी नरोकिएकाले उद्धारकार्य प्रभावित छ । हुलाकी राजमार्गसहित दक्षिणी भेगका ग्रामीण सडक ठाउँठाउँमा भासिएका छन् । सदरमुकाम मलंगवामा भने सबै नाला सफा गरेपछि शनिबार डुबान केही घटेको छ । सर्लाहीका प्रजिअ प्रदीपराज कँडेलले खैर्बा, सिसौट, भाडसर, मानपुर, मूर्तिया, छटौल, महिनाथपुर, बत्रौललगायत गाउँमा धेरै घर डुबानमा परेको बताए । 
बारामा बाढीले कच्ची घर भत्किँदा दुई जनाको मृत्यु भएको छ । आदर्श कोतवाल गाउँपालिका–९ बलधुसवास्थित वृद्धाश्रमको घर भत्किँदा ७० वर्षीय ब्रह्मदेव महतो र सिम्रौनगढ नगरपालिका ८ कचोर्वाकी गहनीदेवी पासवानको ज्यान गएको हो । स्थानीय र प्रहरीको सहयोगमा अन्य ५ जनालाई उद्धार गरियो । जमुनी खोलाबाट बाढी पसेपछि वृद्धाश्रममा १० फिट पानी जमेको स्थानीय प्रमोदप्रसाद यादवले बताए । 
मकवानपुरको भीमफेदी गाउँपालिका–८ इपापाखा टोलमा शनिबार बिहान पहिरोले घर पुरेपछि ५० वर्षीय मीठुमाया दानीको घटनास्थलमै मृत्यु भएको छ । १८ वर्षीया सरु खड्का घाइते छिन् । स्थानीयले उनलाई तत्काल उद्धार गरी स्वास्थ्यचौकी पुर्‍याएका थिए । पहिरो पन्छाउँदा दानीलाई भने मृत अवस्थामा फेला परेको विनोद अधिकारीले बताए । नयाँ सुवज गणको सैनिक टोली र स्थानीय मिलेर पहिरो पन्छाएका थिए । 

पुल बगे
बाराको कोल्हवी क्षेत्रमा आधा दर्जन पुल बग्दा दर्जनौं गाउँबीच सम्पर्कविच्छेद भएको छ । २० वर्षअघि बनेका सबै पुल बगाएको कोल्हवीका स्थानीय भरत भण्डारीले बताए । ‘२०५० सालमा समेत यतिको बाढी आएको थिएन,’ उनले भने । सोनाभार, जुगवा, थस्कौल, धोधड्पा, प्रगतिनगरमा रहेका पुल बगेका छन् । थुपै्र ठाउँमा कच्ची घर भत्किएका छन् । अधिकांश गाउँ डुबानमा छन् । वर्षा र बाढीले जनजीवन कष्टकर बनेको कचोर्वाका वीरेन्द्र यादवले बताए । वर्षाले उर्लिएका जमुनी, तियर, थलही, दुधौरा, बंगरी, पसाहा, अडुवा, लालबकैयालगायत खहरे खोला बस्ती पसेका छन् । क्षति विवरण संकलनसँगै उद्धार कार्यको तयारी भइरहेको सहायक प्रजिअ मुकेश केसरीले बताए । 

सयौं घर डुबे 
पश्चिम तराईका सयौं घर डुबानमा छन । पानी जमेर कच्ची घर भत्किँदा धनजन क्षति बढेको छ । नवलपरासीमा २ सय घर डुबेका छन् । परासी क्षेत्र र सीमावर्ती गाउँपालिकाको जनजीवन प्रभावित छ । प्रतापपुरको अमहवा, बरगदवा, नन्नपुर सरावल गाउँपालिकाको खजुरा र झरही खोलाको बाढीले रामपुर खडौना, कुसौली, भुजहवालगायत गाउँ डुबानमा छन् । विस्थापितहरू स्कुलमा आश्रय लिइरहेका छन् । प्रजिअ उदयबहादुर रानाले शनिबार साँझपख पानी घटेकाले जनजीवन सामान्य बन्दै गएको बताए । ‘खहरे खोलाले निकास नपाउँदा केही बस्ती डुबानमा परे, उद्धारका लागि सुरक्षाकर्मी परिचालन गरिएको छ,’ उनले भने । 
सर्लाहीका विस्थापितलाई प्रशासनले शनिबार राहत पठाएको छ । तर, सडक बिग्रेकाले खैर्वा, सिसौटलगायत ठाउँमा पुग्न सकेको छैन । रेडक्रस, उद्योग वाणिज्य संघलगायत संघसंस्थाको सहयोगमा खाद्यान्न पठाइएको हो । पानी पर्ने क्रम नरोकिएकाले वाग्मती र लखनदेही नदीको सतह बढेको छ । विभिन्न ठाउँमा खेतीयोग्य जमिन कटान भएका छन् । हरिपुरस्थित सबस्टेसनमा पानी जमेकाले विद्युत् अवरुद्ध छ । सुरक्षाटोलीलाई उद्धारका लागि तयारी अवस्थामा राखिएको प्रशासनले जनाएको छ । 
बाराको सिमरास्थित जल तथा मौसम विज्ञान विभाग फिल्ड कार्यालय प्रमुख केशव घिमिरेका अनुसार तीन दिनयता १ सय ४९ दशमलव ४ मिमि वर्षा भएको छ । यो दर यस वर्षकै उच्च रहेको उनले बताए । सहरी क्षेत्रमा व्यवस्थित नाला र गाउँघरमा कुलो नहुँदा बस्ती, गाउँ, हाटबजार, विद्यालय जलमग्न छन् । 
पानी परेसँगै मौसमी गडबडीले सिमरा–काठमाडौंको उडान प्रभावित भएको सिमरा नागरिक उड्डयन कार्यालयका एयर ट्राफिक कन्ट्रोलर अमृत पोखरेलले बताए । बाढीकै कारण विद्यार्थी विद्यालय जान सकेका छैनन् । कच्ची सडक झन् बिग्रेकाले सवारी आवागमन ठप्प भएको बस व्यवसायी संघका विक्रम पटेलले बताए । सदरमुकामबाट गाउँ ओहोरदोहोर गर्ने बसहरू चलेका छैनन् । सरकारी कार्यालयमा सेवाग्राही घटेका छन् । 
मकवानपुरमा बाढीले मनहरी गाउँपालिका २ र ४ का काठे घरसँगै दुई दर्जन माछापोखरी बगाएको छ । ‘चुरेमा खहरे बढ्दै गएकाले बस्तीहरूमा बाढी पस्ने क्रम सुरु भएको छ,’ स्थानीय रामहरि विष्टले भने, ‘यस क्षेत्रका अधिकांश माछा पोखरी बग्ने अवस्थामा छन् ।’ हाँडीखोलाको मसिने र ठाडो खोलामा सानाठूला गरी २ सयभन्दा बढी माछापोखरी छन् । जिल्लाका सबै भेगमा शनिबार मुसलधारे पानी पर्‍यो । हेटौंडास्थित राप्ती र कर्रा खोलाको सतह बढेको छ । 
रौतहटका लालबकैया, वाग्मती, चाँदी नदीको बाढीले दुई दर्जन गाउँ डुबानमा छन् । गरुडा, शिवनगर, महम्मदपुर, हर्साहा, रमौली बैरिया, जिंगडिया, ब्रह्मपुरीका स्थानीय बाढीमा फसेका छन् । चन्द्रनिगाहपुर–गौर सडक खण्डको बिर्ता, जिंगडिया, सरुअठा, सुकदेव चोकमा बाढी जमेको प्रत्यक्षदर्शीले बताए । ग्रामीण भेगको प्रहरी चौकी, इलाका प्रहरी, स्वास्थ्य चौकी, विद्यालय, सरकारी तथा गैरसरकारी कार्यालय पनि डुबेका छन् । 
बाढीमा फसेका महिला, बालबालिकालाई सेनाको टोलीले उद्धार गरिरहेको छ । गरुडा चिनी मिल अगाडिको बस्तीबाट शनिबार स्थानीयलाई उद्धार गरियो । चन्दपुरका ३, ४, ८, ९ वडा डुबानमा छन् । बारा र रौतहटको सिमानामा पर्ने अडुवा खोलाको बाढी बस्तीमा पसेको छ । 
विश्रामपुरमा डुबानमा परेका एक सयभन्दा बढी स्थानीयलाई सुरक्षित स्थानमा पुर्‍याइएको छ । गरुडादेखि दक्षिणको ९० प्रतिशत भूभाग डुबानमा परेको प्रजिअ उद्धवबहादुर थापाले बताए । जिल्ला विपद् व्यवस्थापन समितिको आकस्मिक बसेको बैठकले स्थानीयलाई सुरक्षित स्थानमा पुग्न आग्रह गरेको छ । बाढीकै कारण पश्चिम मार्गको चन्द्रनिगाहपुर–पौराई सडकखण्ड शनिबार ८ घण्टा 
अवरुद्ध भयो । 

प्रकाशित : श्रावण २९, २०७४ ०८:३३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT