खानेपानी हाहाकार

प्रदीप मेन्याङ्बो

धरान — उपमहानगर ७, शान्तिपथकी गंगा मास्केले ढलसँगै विस्तार गरिएको खानेपानी पाइपको टुटीबाट झरेको पानी प्लास्टिकको बोतलमा संकलन गरी गुजारा चलाएको दुई साता भयो ।

उनकै टोलका विनय गुरुङ, खुसी कार्की, सोनी खातुनलगायत उपभोक्ताले बिहानै यसैगरी पानी जोहो गरी गर्जाे टार्ने गरेका छन् । खानेपानी संस्थानले ४० वर्षअघि विस्तार गरेको पाइपबाट चुहिएको पानी संकलन गरी पानीको जोहो गर्नुपर्ने बाध्यता आएसँगै यहाँका बासिन्दा आक्रोशित बनेका छन् ।
ढलभित्र भएर विस्तार गरिएको पाइपबाट प्लास्टिकको बोतलमा पानी संकलन गरिरहेकी मास्केले भनिन्, ‘सुक्खा मौसम भए त ठीकै थियो । मुहानमै पानी कम भएपछि संस्थानले खानेपानी अभावले वितरण गर्न सकेन भनेर सहँदै बसेका थियौं । तर यसपटक त बिजोगै भयो ।’ यसपालिको बर्खामा मुहानमा केही क्षति पुगेको थिएन । कतै बाढी, पहिरोले पाइप बगाएको थिएन । तर पनि स्थानीयले सुक्खायाम सुरु हुनु ५ महिनाअघि नै खानेपानीको हाहाकार बेहोर्नुपरेको हो । स्थानीय विनय गुरुङले भने, ‘पानी अभावले खाना पकाउन पनि मुस्किल भएको छ । चाडबाड आउन लाग्यो, घर सफाइ गर्न, नुहाउन, लुगा धुन के गर्ने होला ?’
संस्थानले शान्तिपथमा पानी वितरण नगरेको साता नाघिसकेको छ । उपभोक्ताले पटकपटक कार्यालयमै पुगेर गुनासो गरेका छन् । तर, सुनुवाइ भएको छैन । संस्थानले पानी अभाव भएर वितरण नगरेको होइन । कतै दिनभर खेर गइहरेको देखे पनि चुपचाप नदेखेझैं गरिन्छ । दैनिक ४० प्रतिशत पानी चुहावट हुने गरेको रिपोर्ट संस्थानले पहिल्यै सार्वजनिक गरे पनि रोक्न कुनै पहल नभएको उपभोक्ताले बताए ।
संस्थानका प्रमुख शैलेन्द्र साहले यो सिजनमा पानी अभाव नहुने बताए । ‘भए पनि केही प्राविधिक समस्याले त्यस्तो भएको हो,’ उनले भने, ‘सदुखर्दुको मुहानबाट कात्तिकसम्म दैनिक अढाइ करोड लिटर पानी ल्याउने गरेका छौं । संस्थानको इन्टेक भएको क्षेत्रमा राति पानी पर्ने गरेको छ । त्यसले भल बाढी बगाएर इन्टेकमा जम्मा गरिदिने भएकाले सफाइ र वितरणमा समस्या आएको हो ।’ उनले समस्या समाधान चाँडै गर्ने आश्वासन दिए । 

 

प्रकाशित : भाद्र २९, २०७४ १०:३७
प्रतिक्रिया
पठाउनुहोस्

स्थानीय सहयोगमा ट्राफिक भवन

कान्तिपुर संवाददाता

पाल्पा — जिल्ला ट्राफिक प्रहरीले नयाँ भवन पाएको छ । ट्राफिक प्रहरी प्रमुख प्रवीण आचार्यको सक्रियता र स्थानीयको सहयोगमा तीनतले पाँचकोठे भवन निर्माण भएको हो ।


जिल्ला तथा बाहिरका ८६ सरकारी, संघसंस्था र व्यक्तिबाट करिब २४ लाख रुपैयाँ नगद तथा जिन्सी सहयोगमा भवन निर्माण भएको प्रमुख आचार्यले बताए ।
ट्राफिक प्रहरीले २०५५ देखि सेवा सुरु गरे पनि २०६३ देखि औपचारिक रूपमा सेवा दिँदै आएको छ । सुरुका समयमा प्रहरी कार्यालयबाटै कार्य सम्पादन गर्ने ट्राफिकले २०५८ देखि तानसेन बसपार्कमा नगरपालिकाको साँघुरो भवनबाट सेवा दिँदै आएको थियो जसका कारण सेवा प्रवाहमा कठिनाइ भएको थियो । ११ जना ट्राफिक प्रहरी प्रमुखको कार्यकाल सकिँदा यसपटक आफ्नै भवन पाएको हो ।
पछिल्लोपटक यहाँ सरुवा भएर आएका आचार्यले भवन निर्माण गर्न जग्गा व्यवस्थापनलगायत काम गरेका हुन् । उनले ट्राफिक व्यवस्थापन, दुर्घटना न्यूनीकरणका लागि सचेतना, घुम्तीमा कन्भेक्स मिरर जडान, जेब्रा क्रसजस्ता काममा उल्लेख्य भूमिका निर्वाह गर्दै आएका छन् । प्रहरी अतिरिक्त महानिरीक्षक मिङ्मार लामाले भवन निर्माणलगायत कार्य उत्कृष्ट गरेबापत ट्राफिक प्रहरी प्रमुख आचार्यसहित प्रहरी हवल्दार थलीबहादुर रेउले, प्रहरी जवानहरू नारायण पौडेल, दुर्गाप्रसाद अर्याल, धर्मराज न्यौपाने, दिपेन्द्रबहादुर केसीलाई नगद र प्रमाणपत्रले सम्मान गरे ।

प्रकाशित : भाद्र २९, २०७४ १०:३७
पूरा पढ्नुहोस्
प्रतिक्रिया
पठाउनुहोस्