गाउँ पुगेनन् बैंक

कान्तिपुर संवाददाता

हेटौंडा — गाउँपालिकामा बैंक नहुँदा स्थानीय तहलाई आर्थिक गतिविधि अघि बढाउन असहज भएको छ । सानोभन्दा सानो बैंकिङ कारोबारका लागि पनि जनप्रतिनिधि र कर्मचारी हेटौंडा नै पुग्नुपर्ने बाध्यता छ ।


मकवानपुरका कैलाश, राक्सिराङ, इन्द्रसरोवर, मकवानपुरगढी र बागमती गाउँपालिकामा एउटै बैंक छैनन् । बकैया र मनहरी गाउँपालिकामा एक–एक वटा निजी बैंक छन् । मनहरीमा स्थानीय निर्वाचनपछि बैंक राखिएको हो । ‘बैंक नहुँदा गाउँपालिकालाई आर्थिक कारोबार गर्न समस्या छ,’ कैलाश गाउँपालिकाका अध्यक्ष टंक मोक्तानले भने, ‘सानो कारोबार गर्न पनि हेटौंडा नै पुग्नुपर्छ ।’
गाउँपालिकाले सामुदायिक विद्यालयका शिक्षक, कर्मचारी, स्वास्थ्य, कृषि र भेटेरेनरीका कर्मचारीलाई पनि मासिक तलब उपलब्ध गराउनुपर्छ । उनीहरूले हेटौंडास्थित राष्ट्रिय वाणिज्य बैंक र नेपाल बैंकबाट आर्थिक कारोबार गर्ने गरेका छन् । सरकारले गाउँपालिका क्षेत्रमा साउन महिनाभित्रै बैंक स्थापना हुने जनाएकामा असोज बित्न लाग्दा पनि सुरसार छैन । ‘मासिक तलब होस् वा अन्य कारोबार गर्न, सदरमुकाम नै धाउनुपर्छ’ वाग्मती गाउँपालिकाका कार्यकारी अधिकृत भीम परियारले भने, ‘यसले गर्दा जनप्रतिनिधि र कर्मचारीलाई सास्ती छ ।’
गाउँपालिकाका केन्द्रमा सुरक्षा व्यवस्था, इन्टरनेट सेवा र भौतिक पूर्वाधार नभएकाले शाखा विस्तार गर्न नसकिएको हेटौंडास्थित एक बैंकका मेनेजरले भने, ‘कैलाश र मकवानपुर गढीमा शाखा स्थापना गर्न कोसिस गरिए पनि पूर्वाधार नहुँदा सम्भव भएन ।’ राक्सिराङको केन्द्रमा सुरक्षा, इन्टरनेट सेवा, बाटोघाटो र बैंक राख्ने भवनको अभाव छ मकवानपुर गढीमा सुरक्षा, इन्टरनेट सेवा र भवन छैन । कैलाश र वाग्मतीमा इन्टरनेट सेवा र भवन व्यवस्थापन गर्न समस्या छ । इन्द्रसरोवरमा इन्टरनेट र अरू पूर्वाधार छैनन् ।
पूर्वाधार अभावमा स्थानीय तहले संविधान प्रदत्त अधिकार प्रयोग गर्न नपाएको र ती सबै कागजमै सीमित हुन पुगेको कर्मचारी बताउँछन् । राष्ट्रबैंकले स्थानीय तहमा शाखा विस्तार गर्न बैंकहरूलाई निर्देशन दिइसकेको छ । हेटौंडामा मात्र चार दर्जनभन्दा बढी बैंकका शाखा छन् ।

प्रकाशित : आश्विन ३०, २०७४ ०७:१६
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

आगलागी घटना ‘नियोजित’

कान्तिपुर संवाददाता

कानेपोखरी (मोरङ) — कोनेपोखरी गाउँपालिका–३ हरकपुरमा आगोले जलेर घरसहित एकै परिवारका चार जनाको मृत्यु घटना नियोजित भएको पीडित परिवारले आरोप लगाएको छ ।


मृतकका आफन्तले घटना भवितव्य नभई हत्या भएको दाबी गरेका हुन् । उनीहरूले सूक्ष्म अनुसन्धान गरी दोषीलाई कारबाही गर्न माग गरे । पीडित परिवारले घटना शंकास्पद भए पनि प्रहरी प्रशासन गम्भीर नबनेको आरोप लगाए । उनीहरूले आइतबार घटनास्थलमै पत्रकार सम्मेलन गरी घटनामा शंका गर्ने आधारहरू धेरै रहे पनि यथेष्ट प्रमाणको अभावमा किटानका साथ अघि बढ्न नसकिएको बताए ।
आश्विन ४ गते राति आगलागी हुँदा हरकपुरका ५६ वर्षीय चन्द्रकुमार राई, उनकी ८६ वर्षीया आमा गंगामाया, श्रीमती ४९ वर्षीया पार्वता र बहिनी ४६ वर्षीया विष्णुकुमारीको जलेर मृत्यु भएको थियो । राति करिब २ बजेतिर भएको आगलागीमा उनीहरूसहित दुई तले काठको घर नष्ट भएको थियो । मृतक चन्द्रकुमारका दाजु रामकुमारले आमा, भाइ, बहिनी र बुहारीको मृत्यु नभई हत्या भएको दाबी गरे । उनले नियोजित रूपमा केही व्यक्तिले चारैजनाको हत्या गरी घरमा आगो लगाइदिएको बताए । ‘आगलागीबाट चारैजनाको मृत्यु हुनु शंकास्पद छ । यति ठूलो घर जलेर खरानी हुँदासम्म किन कोही चिच्याएन ? घरको बेरा भत्काएर किन हामफालेनन् ?’ उनको प्रश्न थियो ।
‘आमा अशक्त भए पनि अन्य तीन जनामध्ये कोही एक जना त बच्नुपथ्र्यो । आगोले पोल्दा चिच्याउनुपथ्र्यो । कसैलाई बचाउन नसक्दा पनि मेरो भाइले उत्तरतिरको बेरा भत्काएर धान खेतमा हाम फाल्न सक्ने अवस्था थियो । तर, त्यस्तो कुनै प्रयास गरेको देखिँदैन,’ उनले भने, ‘यसबाट पनि उनीहरूको हत्या भएको आशंका गर्न सकिन्छ ।’
मृतककी बहिनी इन्दिरा राईले विद्युत् सर्ट भएर आगलागी भएको भनी प्रहरीको सूचना गलत भएको बताइन् । उनले विद्युत् सर्ट भएर आगलागी हुँदा एक छेउबाट आगो लाग्नुपर्नेमा घरको चारैतिर एकैपटक आगो लाग्नुले उक्त कुराको पुष्टि नहुने बताइन् । ‘यति दर्दनाक घटनालाई सहजै सल्टाउन खोजेजस्तो देखिन्छ,’ उनले भनिन् । 

 

प्रकाशित : आश्विन ३०, २०७४ ०७:१६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT