आरोप–प्रत्यारोप मात्रै नगरौं

नेपाली राजनीतिमा सधैं आरोप–प्रत्यारोप हावी रहेको पाइन्छ । चुनाव नजिकिँदै गर्दा पछिल्ला केही दिनदेखि यता विशेषगरी वाम गठबन्धन र लोकतान्त्रिक गठबन्धनबीच त एकअर्कामा घोचपेच, आरोप, प्रत्यारोपको शृंखला झन्–झन् चुलिँदै गइरहेको छ । त्यसो त यता वाम गठबन्धन देखेर अत्तालिएका हाम्रा प्रधानमन्त्रीको पछिल्लो समयको चर्चित अभिव्यक्ति ‘कम्युनिस्टले जिते रुन पाइँदैन’ आफैंमा हाँसो उठ्दो छ । रुन पाइंँदैन भन्नुको भाव अर्को अर्थमा वाम गठबन्धनले जितेमा जनतामा सुख, समृद्धि, खुसी, उल्लास छाउनेछ । त्यसैले रुन पाइँदैन, अर्थात रुन पर्दैन भन्नेजस्तो पनि देखिन्छ । उता वाम गठबन्धनले पनि अरू पार्टी या गठबन्धनलाई यस्तो र उस्तो नभनी जिम्मेवारपूर्ण र सकारात्मक सन्देश प्रवाह हुनेगरी प्रचार–प्रसारका कार्यक्रम सञ्चालन गर्दा राम्रो हुने थियो । अरू पार्टीका विचार, सिद्धान्त, नेता र कार्यकर्तालाई गाली गरेर उनीहरूको उछित्तो काढेर मात्रै चुनावमा भोट तान्न खोज्नु कदापि उचित नहोला । 
– युवराज अधिकारी 
भरतपुर–१०, सप्तगण्डकी चोक, चितवन