एथलेटिक्स खेलाडी बैंककतिर

कान्तिपुर संवाददाता

काठमाडौं — दोस्रो एसियाली युथ एथलेटिक्स च्याम्पियनसिपमा नेपालका ४ खेलाडीले भाग लिने भएको छ । मे २० देखि २३ तारिखसम्म थाइल्यान्डको बैंकक हुने प्रतियोगितामा पुरुषमा आशिष खत्रीले १ र २ सय मिटर दौड, लुजला अमात्य र जयरानी चौधरीले महिला १ र २ सय मिटर दौडमा तथा विपना परियारले लङजम्प र ट्रिपलजम्पमा प्रतिस्पर्धा गर्नेछिन् ।

प्रशिक्षकमा मनोहर दाहाल छन् । टिम शुक्रबार जाँदै छ ।

आयोजक र ओडिसी विजयी
आयोजक बसुन्धारा नेसनल एकेडेमी र डिफेन्डिङ च्याम्पियन ओडिसी एकेडेमी दोस्रो बीएनए कप अन्तरविद्यालय बास्केटबलको जुनियर ब्वाइजमा विजयी भए । आयोजकले ग्रिनल्यान्डलाई २७–२४ स्कोरले हराउँदा हितेश गुरुङले १३ स्कोर गरे । अनिशको १९ स्कोरमा ओडिसीले नवजीवनलाई ३०–१७ ले हरायो । नेपाल मोडेल, लालीगुराँस, स्किब्स र इडेन ब्रिज पनि विजयी भए ।

प्रकाशित : जेष्ठ ५, २०७४ ०९:०८
ADVERTISEMENT
प्रतिक्रिया
पठाउनुहोस्
ADVERTISEMENT

सटलटाइमका लागि अस्ट्रेलियातर्फ

कान्तिपुर संवाददाता

काठमाडौं — सटलटाइम कार्यक्रमअन्तर्गत १० सदस्यीय नेपाली ब्याडमिन्टन टोली शुक्रबार अस्ट्रेलिया जाँदै छ । सटलटाइम कनेक्ट प्रोग्रामका लागि विभिन्न विद्यालयका ७ युथ खेलाडीसहितको नेपाली टिम अस्ट्रेलिया जान लागेको हो ।

सटलटाइम एउटा अन्तर्राष्ट्रिय विद्यालय ब्याडमिन्टन कार्यक्रम हो । अन्तर्राष्ट्रिय गैरसरकारी संस्था स्पोर्ट्स म्याटरसँग मिलेर विश्व ब्याडमिन्टन संघले १ सय ८ देशमा यो कार्यक्रम चलाइरहेको छ । अस्ट्रेलियन ब्याडमिन्टनले नेपालमा एउटा नवीन कार्यक्रमको रुपमा यसलाई ल्याएको हो ।

जसअनुसार नेपालका सात विद्यालयका खेलाडीले अस्ट्रेलियाका विभिन्न सात विद्यालयमा गएर ब्याडमिन्टनसहित संस्कृति, शिक्षालगायतका कार्यक्रम आदानप्रदान गर्नेछन् । नेपालबाट वागेश्वरी स्कुलकी विजया माका, बासुकी प्रसिद्धि अगान्जा, जनसेवाकी रश्मी महर्जन, रत्नराज्यका सुजन खाका, कालिकाशरणकी शैली शाह, सीतारामका अम्बरबहादुर मगर र बाल विकासकी युनिका निरौला छन् ।
कार्यक्रमका नेपाल संयोजक दीपक थापाको नेतृत्वमा अस्ट्रेलिया जाने टोलीमा शिक्षक मनोज आचार्यसहित निजी खर्चमा ब्याडमिन्टन टोलीका पदाधिकारी र खेलाडीका अभिभावक पनि छन् ।

काठमाडौं र भक्तपुरका ४० विद्यालयका २ सय विद्यार्थीबाट ७ खेलाडी छनोट गरिएको संयोजक थापाले बताए । उनका अनुसार कार्यक्रमको निर्देशनबमोजिम अधिकांश सरकारी विद्यालयबाट खेलाडी छनोट गरिएको हो ।

प्रकाशित : जेष्ठ ५, २०७४ ०९:०८
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT