अर्पणको कप्तानीमा यू–१८ टोली

कान्तिपुर संवाददाता

काठमाडौं — साफ यू–१८ च्याम्पियनसिपमा भाग लिने यू–१८ राष्ट्रिय फुटबल टोलीको बुधबार छनोट गरिएको छ । मुख्य प्रशिक्षक छिरिङ लोप्साङले २३ सदस्यीय टोली छनोट गरेको अखिल नेपाल फुटबल संघले जनाएको छ ।

टोलीमा साफ र एएफसी यू–१६ च्याम्पियनसिप खेलेका खेलाडीको बाहुल्य छ । जेठमा आयोजित ललित स्मृति यू–१८ फुटबल प्रतियोगिताको प्रदर्शनका आधारमा प्रारम्भिक छनोट गरिएको थियो । ७४ खेलाडीसम्मिलित तीन चरणको छनोटपछि अन्तिम नाम सार्वजनिक भएको हो । टोली कप्तानमा गोलरक्षक अर्पण कार्की र उपकप्तानमा फरवार्ड प्रेजेन तामाङ छन् । दुवै यू–१८ लिग च्याम्पियन त्रिभुवन आर्मीका सदस्य हुन् ।
लोप्साङसँगै सहायक प्रशिक्षक पुष्कर शाही र गोलरक्षक प्रशिक्षक मृगेन्द्र मिश्र पनि प्रशिक्षक टोलीमा छन् । व्यवस्थापकमा एन्फा सदस्य गणेश चन्द छन् ।
प्रतियोगितामा हेरफेर
भुटानमा असोज २ बाट हुने साफ यू–१८ च्याम्पियनसिपको तालिका हेरफेर भएको छ । यसअघि सहभागी ६ टोलीलाई दुई समूहमा विभाजित गरेर लिगकम नकआउटमा खेलाइने भएको थियो । तर अन्तिम समयमा श्रीलंकाले सहभागिता जनाउन असमर्थता जनाएपछि साफले नयाँ पद्धतिमा प्रतियोगिता गर्ने भएको छ । अब सहभागी ५ टोलीले राउन्ड रोबिन लिगमा प्रतिस्पर्धा छन् ।
अंकतालिकाको शीर्षस्थानमा रहने टोलीले उपाधि जित्नेछ । प्रतियोगितामा आयोजक भुटानसँगै नेपाल, भारत, बंगलादेश र माल्दिभ्सको सहभागिता रहनेछ । यसअघि साफ यू–१९ को नाममा भएको पहिलो संस्करणको उपाधि घरेलु टोली नेपालले जितेको थियो । 

यू–१८ राष्ट्रिय फुटबल टोली
गोलरक्षक : अर्पण कार्की (कप्तान), अभिषेक बराल, सन्देश गुरुङ
डिफेन्डर : सुमन अर्याल, विश्वास उदास, रोमन लिम्बु, असिम भुसाल, आकाश श्रेष्ठ, विकास खवास, निराजन महर्जन, राजन गुरुङ
मिडफिल्डर : दिनेश हेन्जन, अशोक थापा मगर, अभिषेक रिजाल, एरिक विष्ट, अनिल महर्जन, सेसेहाङ आङदेम्बे
फरवार्ड : प्रेजेन तामाङ (उप–कप्तान), राम वाजी, धिरज श्रेष्ठ, रेजिन सुब्बा, दिपेश आले मगर, राजीव लोप्चन ।

प्रकाशित : भाद्र २९, २०७४ ०७:५९
प्रतिक्रिया
पठाउनुहोस्

एसीसी यू–१९ इस्टर्न रिजन क्रिकेट : नेपाल सेमिफाइनलमा

कान्तिपुर संवाददाता

काठमाडौं — नेपालले एसीसी यू–१९ इस्टर्न रिजन क्रिकेटमा लगातार दोस्रो जितसँगै सेमिफाइनलमा स्थान बनाएको छ । मलेसियामा जारी प्रतियोगितामा बुधबार नेपालले भुटानलाई ९ विकेटले हराएको थियो ।

टस जितेर ब्याटिङ गरेको भुटानले तेस्रो ओभरमै ओपनर जीवन घलेलाई गुमाएको थियो। तीव्र गतिका बलर नन्दन यादवले नेपाललाई सुरुआती सफलता दिलाए। कप्तान दीपेन्द्रसिंह ऐरीले आठौं ओभरमा २ विकेट लिएपछि भुटान थप समस्यामा पर्‍यो। १३ रन जोडेका उगेन दोर्जी र पेम छेदुपले तेस्रो विकेटका लागि ५९ बलमा १४ रनको साझेदारी गर्दै धैर्यपूर्वक इनिङ अगाडि बढाए। तर दोर्जी कप्तान दीपेन्द्रबाट कट एन्ड बोल्ड भए। लगातार विकेट गुमाएपछि भुटान २८ ओभरमा ५० रनमै अलआउट भयो।

भुटानको तल्लोक्रम ध्वस्त पार्ने क्रममा स न्दीप लामिछानेले ७ ओभरमा ७ रन खर्चंदै ४ विकेट लिए। भुटानका कप्तान टासी फुन्सोले सर्वाधिक १६ रन बनाए। नेपालका कप्तान दीपेन्द्रले ५ खेलाडीलाई पेवेलियन पठाए। उनी म्यान अफ द म्याच चुनिए।

बायाँतर्फ प्रनित थापामगर। एनएसजेएफ

जवाफी ब्याटिङमा उत्रिएको नेपालले १ विकेट क्षतिमा लक्ष्य प्राप्त गर्‍यो। ओपनर सन्दीप सुनार २६ बलमा २१ रन जोड्दै क्याचआउट भए। विजयी रन जोडेका आसिफ शेख २३ रनमा अविजित रहँदा उनलाई अनिलकुमार शाहले साथ दिए। अनिलले ४ रन जोडे।

समूह ‘ए’ को अंकतालिकामा नेपाल र सिंगापुरको ४–४ अंक छ। नेट रनरेटका आधारमा नेपाल शीर्षस्थानमा छ। समूह विजेताको टुंगो लगाउन बिहीबार नेपाल र सिंगापुर भिड्दै छन्। लगातार पराजयपछि भुटान र थाइल्यान्ड प्रतियोगिताबाट बाहिरिएका छन्।

समूह ‘बी’ बाट मलेसिया र कङकङले अन्तिम चारको यात्रा तय गरिसकेका छन्। उक्त समूहको पुछारमा रहेका म्यानमार र चीन प्रतियोगिताबाट बाहिरिसकेका छन्। सेमिफाइनल सेप्टेम्बर १६ र फाइनल १७ मा हुने कार्यक्रम छ। फाइनलमा पुग्ने टोली यू–१९ एसिया कपलाई छनोट हुनेछ। सिंगापुरविरुद्ध क्षमताअनुसार प्रदर्शन गरे जित कठिन नहुने प्रशिक्षक विनोद दासको बुझाइ छ। ‘पानी परिरहेका कारण हामीलाई छिट्टै खेल सिध्याउने चुनौती छ। आफ्नो क्षमतामा विश्वास राखेका छौं। शतप्रतिशत जित लिएर अगाडि बढ्ने योजना छ,’ उनले भने।

प्रकाशित : भाद्र २९, २०७४ ०७:५९
पूरा पढ्नुहोस्
प्रतिक्रिया
पठाउनुहोस्