नेपाल बंगलादेशसँग २ विकेटले पराजित

सुबास हुमागाईं

क्वालालम्पुर — एसीसी अन्डर १९ एसिया कपअन्तर्गत समूह चरणको पहिलो खेलमा नेपाल बंगलादेशसँग पराजित भएको छ । वर्षाका कारण ओभर घटाइएको खेलमा टस जितेर फिल्डिङ रोजेको बंगलादेशले ४० ओभरमा १ सय ८१ रनको लक्ष्य पाएको थियो ।

बंगलादेशका लागि ओपनर नइम शेखले ५२ रनको योगदान दिए । मध्यक्रमका अफिफ हुसेनले ३३ र महिदुल इस्लामले २३ रन जोडेपछि बंगलादेश जिततर्फ अग्रसर भयो । नेपालका सन्दिप लामिछाने र कमल सिंह ऐरीले २/२ विकेट लिएका थिए । अन्तिम ओभरसम्म पुगेको खेलमा बंगलादेशले अन्त्यतिर आक्रमक खेलेपछि जित हात पारेको थियो । उसले ८ विकेट गुमाउँदै १ बल बाँकी रहँदा जित हात पार्‍यो ।

नेपालले ४०.१ ओभरमा ६ विकेट गुमाउँदै १ सय ६७ रन जोडेको अवस्थामा पानी परेपछि खेल रोकिएको थियो ।

ओपनर जितेन्द्र सिंहलाई सस्तैमा गुमाएको नेपालका लागि शीर्ष क्रमका ब्याट्सम्यानले बलियो साझेदारी दिन सकेनन् । राम्रो सुरुआत लिएपनि अनिल साह १९(२२) र दिपेन्द्र सिंह ऐरी १२(४१) ले पारीलाई अगाडी बढाउन सकेनन् । आसिफ शेख ३० (५२) रनमा स्टम्पिङ आउट भएका थिए ।

मध्यक्रममा ब्याटिङ गर्न आएका रोहित कुमार पौडेल र भीम सार्कीले नेपालको इनिङ सम्हालेका थिए । उनीहरुले १३.२ ओभरमा ७९ रनको साझेदारी गरे । रोहितले ५४ बलमा ४० रन जोड्दा २ चौका र २ छक्का प्रहार गरे । भीमले ४० बलमा २ चौका र ३ छक्काको मदतले ४४ रनको आक्रामक पारी खेले ।

बंगलादेशका लागि स्पिनर नईम हसानले ३ विकेट लिएका थिए । हसन महमुद, ओनिक इस्लाम र अफिफ होस्सैनको नाममा पनि १/१ विकेट रह्यो ।

प्रकाशित : कार्तिक २५, २०७४ १७:१०
ADVERTISEMENT
प्रतिक्रिया
पठाउनुहोस्
ADVERTISEMENT

कांग्रेसले अब मुलुकको नेतृत्व गर्न सक्दैन : पोखरेल

कान्तिपुर संवाददाता

काठमाडौं — नेकपा (एमाले)का महासचिव ईश्वर पोखरेलले स्थायी सरकारका लागि वाम गठबन्धन नै अहिलेको अपरिहार्य शक्ति रहेको बताएका छन् ।

आफू उम्मेदवार रहेको काठमाडौं निर्वाचन क्षेत्र ५ को कार्यक्रमलाई शनिबार धापासीमा सम्बोधन गर्दै उनले भने, ‘राजनीतिक अस्थिरताले मुलुक आक्रान्त छ, त्यसैले देश समृद्धिका लागि अब बहुमतको सरकार आवश्यक छ ।’ कांग्रेस पटक पटक बहुमत ल्याएर परीक्षण भइसकेको पार्टी भन्दै उनले जनतालाई विकास र समृद्धि दिने कुरामा कांग्रेस पूर्णत: असफल भएको दाबी गरे ।

‘इतिहासले पुष्टि गरेको कुरा नै के हो भने कांग्रेसले बहुमत ल्याए पनि मुलुकलाई राजनीतिक स्थिरता दिन सकेन, सुशासन र विकास त परै जाओस्’ उनले स्मरण भने, ‘२०१५ सालमा दुई तिहाइ बहुमत ल्याएर पनि कांग्रेसले साढे १ वर्ष सरकार चलाउन सकेन, २०४८ सालमा आरामको बहुमत ल्यायो तर तीन वर्ष पनि टिकाउन सकेन, २०५६ सालमा पनि बहुमत ल्यायो र राजाको हातमा प्रजातन्त्र बुझायो, त्यसैले इतिहासमा यसरी पटक पटक असफल भइसकेको पार्टीले अब मुलुकको नेतृत्व गर्न सक्दैन ।’

वाम गठबन्धनको सहकार्यले कांग्रेस आत्तिएको भन्दै केही नलागेपछि भ्रमपूर्ण प्रचारमा उत्रिएको बताए । ‘विचार मिल्दा पार्टीहरु एकताबद्ध हुन्छन्, नजिक हुन्छन् त्यसको त स्वागत गर्नुपर्ने हो तर दु:खलाग्दो कुरा अहिले कांग्रेस निकै भ्रमपूर्ण प्रचारमा व्यस्त छ ।’ कम्युनिष्टले जिते भने रुन पनि पाइँदैन भनेर कांग्रसेका केही नेताले प्रचार गरेकोप्रति उनले असन्तुष्टि पोखेका हुन् ।

२०५१ सालमा एमालेले अल्पमतको सरकार बनाउँदा पनि कांग्रेसले यस्तै भ्रमपूर्ण कुरा गरेको उनले उल्लेख गरे । ‘हामीले अल्पमतको सरकार बनाउँदा पनि कांग्रेसले बुढाबूढीलाई गोली हानेर मार्छ, मठ मन्दिर भत्काउँछ, धर्म मान्दैन भनेर खुबै प्रचार गथ्र्यो तर एमालेले नै त्यसबेला जेष्ठ नागरिक र विधुवालाई एक सय रुपैयाँ भत्ताको व्यवस्था गर्‍यो,’ उनले भने, ‘अहिले त्यसलाई केपी ओली सरकारले दुई हजारमा पुर्‍यायो अब वामपन्थी सरकारले त्यसलाई पाँच हजार पुर्‍याउँछ, अनि के बुढाबूढी रुनुपर्छ त ? रुनै पर्दैन ।’

कांग्रेसले अहिले चलाएका सबै भ्रमलाई बर्बराहटको संज्ञा दिँदै नेता पोखरेलले अधिनायकवाद लाद्ने कुरा गरेर समय खेर नफाल्न सुझाव दिए ।

चुनावी अभियानका क्रममा धापासीमा निर्वाचन क्षेत्र नं. ५ मा क्रियाशील कांग्रेस कार्यकर्तारु शंकर भण्डारीको नेतृत्वमा जयराम पाण्डे, शंकर कुँवर, शंकर सुनारलगायत एमाले प्रवेश गरेका थिए ।

प्रकाशित : कार्तिक २५, २०७४ १७:१०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT