आर्मी र पुलिस सेमिफाइनलमा

कान्तिपुर संवाददाता

काठमाडौं — आयोजक त्रिभुवन आर्मी क्लब र नेपाल पुलिस क्लब प्रधानसेनापति पाँचौं अन्तर्राष्ट्रिय फुटबल प्रतियोगिताको सेमिफाइनल प्रवेश गरेका छन् ।

आइतबारको पहिलो खेलमा आयोजक आर्मीले सिक्किमलाई ५–० ले पराजित गर्‍यो । सपना लामाको १४ औं मिनेटको गोलमा अग्रता लिएको आर्मीले ४२ औं मिनेटमा कृष्णा खत्रीको गोलमा अग्रता दोब्बर पार्‍यो । पहिलो हाफमा दुई गोलले अगाडि रहेको आर्मीले दोस्रो हाफमा तीन गोल थप्यो । रेना घिसिङको आत्मघाती गोलमा अग्रता बढाएको आर्मीका लागि सपना लामा र कृष्णा खत्रीले पुन: १–१ गोल थपे । दुई गोल गरेर उत्कृष्ट प्रदर्शन गरेकी सपना वुमन अफ द म्याच भइन् ।

आर्मीका प्रशिक्षक आदर्श मल्ल टोलीको प्रदर्शनबाट सन्तुष्ट देखिए । ‘खेलाडीले योजनाअनुसार नै खेले । हामीले गोल थप्ने धेरै अवसर गुमायौं । सोचेजति गोल नहुँदा पनि यस जितबाट म सन्तुष्ट छु । अबको लक्ष्य फाइनल पुग्नुहुनेछ,’ उनले भने । आर्मीले सेमिफाइनलमा मध्यमाञ्चलको सामना गर्नेछ ।

दोस्रो खेलमा नीरु थापाले ह्याट्रिक गरेपछि पुलिसले बिहारलाई ५–१ ले पाखा लगायो । खेलको सातौं मिनेटमा खाता खोलेकी नीरुले २१ औं मिनेटमा दोस्रो गोल थपिन् । उनले ५४ औं मिनेटमा मैदानको दायाँ भागबाट आएको क्रसलाई उत्कृष्ट फस्ट टच भलीमा गोल गर्दै ह्याट्रिक पूरा गरिन् । त्यसअघि ममता कुमारीले बिहारका लागि गोल गर्दै अग्रता घटाएकी थिइन् । निशा सुनारले दुई गोल थप्दै टोलीलाई सहज जित दिलाइन् । नीरु खेलको म्यान अफ द म्याच भइन् ।

पुलिसका प्रशिक्षक सञ्जीव जोशीले जितसँगै सेमिफाइनल यात्रा तय गर्दा खुसी व्यक्त गरे । ‘भारतको टोली पनि बलियो नै थियो । हामीले सुरुमै गोल गरेपछि खेलमा जित दर्ता गर्न सहज भयो । हामीले फाइनल पुग्ने लक्ष्य राखेका छौं,’ उनले भने । पुलिसले सेमिफाइनलमा एपीएफको सामना गर्नेछ । दुवै सेमिफाइनल खेल मंगलबार हुनेछन् ।

प्रकाशित : मंसिर ४, २०७४ ०९:३६
प्रतिक्रिया
पठाउनुहोस्
ADVERTISEMENT

भारत खेलमा फर्कियो

एएफपी

कोलकाता — ओपनरद्वय लोकेश राहुल र शिखर धवनको सम्हालिएको अर्धशतकसँगै भारतले श्रीलंकाविरुद्धको पहिलो टेस्टमा राम्रो पुनरागमन गरेको छ । पहिलो इनिङमा पछि परेको भारतले वर्षाले प्रभावित टेस्टको चौथो दिनमा सुधारिएको ब्याटिङ गरेको हो ।

पहिलो विकेटका लागि धवन र राहुलले १ सय ६६ रनको साझेदारी गरे । धवन ९४ रनको व्यक्तिगत स्कोरमा पेस बलर दासुन सानाकाको बलमा आउट भए । दोस्रो इनिङको सुरुआतमा १ सय २२ रनले पछि परेको भारत ४९ रनले अगाडि छ । कोलकाताको इडन गार्डेनमा खराब प्रकाशका कारण आइतबारको खेल रोकिनुअघि चेतेश्वर पुजारा दुई र राहुल ७३ रन बनाएर खेलिरहेका छन् ।

फर्ममा रहेका राहुलले पछिल्ला ११ इनिङमा नवौं अर्धशतक बनाउँदा दायाँ हाते धवनले चौथो टेस्ट अर्धशतक बनाए । सानाकाले दिनको अन्त्यतिर धवनको विकेट लिंदै उनलाई सातौं टेस्ट शतक बनाउन दिएनन् । उनले राहुलसँग मिलेर १९ चौका प्रहार गर्दा श्रीलंकाले निरन्तर बलर परिवर्तन गर्नुपरेको थियो । धवनले आफ्नो पारीमा २ छक्का प्रहार गरे ।

त्यसअघि स्पिनर रंगना हेराथले सुदृढ ब्याटिङ गर्दै ६७ रनको पारी खेलेपछि श्रीलंकाले २ सय ९४ रनको योगफल तयार परेको थियो । त्यसअघि भारत १ सय ७२ रनमा अलआउट भएको थियो । १६५–४ को स्थितिमा दिनको खेल सुरुआत गरेको श्रीलंकाको मध्यक्रम खस्किएपछि हेराथले श्रीलंकाको इनिङलाई उकासेका थिए । उनले भारतका पेस बलरलाई परास्त गर्दै १ सय ५ बल खेल्ने क्रममा ९ चौका प्रहार गरे । तेस्रो अर्धशतक बनाएका हेराथ भुवनेश्वर कुमारको बलमा डिप पोइन्टमा क्याच आउट भए ।

तीव्र गतिका बलर मोहम्मद सामीले अघिल्ला दिनका दुवै ब्याट्सम्यानलाई पेभेलियन फर्काउँदै सुखद सुरुआत गरे । विकेटकिपर ब्याट्सम्यान डिकवेलाले ३५ र दिनेश चण्डिमलले २८ रन जोडे । भारतका लागि भुवनेश्वर र सामी दुवैले ४–४ विकेट लिए । दुई विकेट उमेश यादवको नाममा रह्यो । श्रीलंका भारतीय भूमिमा पहिलो टेस्ट जितको खोजीमा छ ।

प्रकाशित : मंसिर ४, २०७४ ०९:३६
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT