फोन गर्न डेढ घण्टा पैदल

कान्तिपुर संवाददाता

ओखलढुंगा — जताततै सञ्चारको विकास भएको छ । हात हातमा मोबाइल सुविधा बढेपछि संसार साँघुरिएको अनुभव दुर्गम गाउँका लागि समेत छ । तर सोलुखुम्बुको गुदेल गाविसको योक्स्खा गाउँका लागि भने यो कुरा अझै गफमै सीमित भएको छ । उनीहरूको गाउँमा अहिलेसम्म कुनै किसिमको टेलिफोन सेवा पुगेको छैन ।

कसैलाई फोन गरिहाल्नुपर्‍यो भने सबैभन्दा नजिक पर्ने निम्चोला डाँडासम्म पुग्नुपर्छ । त्यहाँ पुग्न डेढ घण्टा लाग्ने गर्छ । ‘हाम्रो गाउँमा त सञ्चार भनेको रेडियो मात्र हो । रेडियो चाँहि बज्छ तर फोन गर्नु पर्‍यो भने निम्चोला डाँडामा पुग्नै पर्छ ।’ स्थानीय निमासाङ्गगे शेर्पाले भने, ‘जिल्लाभरि टेलिफोनका टावर ठडिएका छन् । तर हाम्रो गाउँसम्म यो सुविधा आईपुगेको छैन ।’

थोरै जनसँख्या भएकोले सेवा प्रदायक संस्थाहरूले पनि बेवास्ता गरेको शेर्पाले बताए । जिल्लामा सञ्चालित सिडिएमए, नमस्ते र एनसेल कुनै फोनको पहुँच पुगेको छैन । योक्स्खा गाउँमा शेर्पा र राई गरि करिव २० घर बसोबास गर्छन् । यस विषयमा पटक पटक माग गरेपनि सम्बन्धित निकायले बेवास्ता गरेको स्थानीयहरू बताउँछन् । 

नेपालमा थ्रिजी, फोरजी चल्ने कुरा रेडियोमा सुन्न पाएका स्थानीयहरू हालसम्म आफन्त तथा साथीभाईसँग घरमा बसेर बोल्न नपाउने योक्स्खाको समस्या कसैले नसुनेको भन्दै गुनासो गरेका छन् । 

प्रकाशित : फाल्गुन २९, २०७३ ०७:४०
प्रतिक्रिया
पठाउनुहोस्

सात महिनादेखि बिनातलब काम

यूएईमा नेपाली सुरक्षा गार्ड
होम कार्की

काठमाडौं — संयुक्त अरब इमिरेट्स (यूएई) का राष्ट्रपतिका सल्लाहकार डा. शेख सुल्तान बिन खलिफा बिन जायद अल–नायनको रोयल फाल्कन सेक्युरिटी, एलएलसी कम्पनीले झन्डै ३ सय नेपाली सुरक्षाकर्मीलाई ३ देखि ७ महिनासम्मको तलब दिएको छैन ।

यूएईको अर्धसरकारी कम्पनीको रोयल फाल्कनले बिनातलब काममा लगाइरहेको पीडित नेपाली सुरक्षागार्डले बताएका छन् । उनीहरूले तलब दिलाई स्वदेश पठाइदिन माग गर्दै नेपाली दूतावासलाई अनुरोध गरेका छन् । सबभन्दा बढी पीडित हुनेमा पछिल्लो लटमा पुगेका नेपाली कामदार छन् । त्यहाँ दुई वर्षदेखि कार्यरत नेपालीसमेत छन् । ‘पुरानाले तीन महिना र नयाँले ७ महिनादेखि तलब पाएका छैनन्,’ पीडित पदमसिंह भण्डारीले भने, ‘सबै साथी दूतावासमा जान डराएका छन् । नयाँ आएका मध्ये २४ जनाले भने दूतावासमा गएर उजुरी हालेका छन् ।’

२०१२ मे ७ देखि कम्पनी खोलेर फाल्कनले नेपालीलगायत विदेशीलाई विभिन्न होटल, मल र सीमा छेउका कम्पनीलाई सुरक्षा गार्ड आपूर्ति गर्दै आएको थियो । ‘अर्धसरकारी र शेखको कम्पनी भनेर यूएई आयौं । म्यानपावरलाई ३ लाख ८० हजारदेखि ४ लाख २५ हजार रुपैयाँ बुझायौं,’ गोरखाका सरोज अर्यालले भने, ‘यूएई पुगेको ९ महिनासम्म पनि काम नपाएपछि फर्कनुपर्‍यो ।’ त्यस कम्पनीमा डीडी म्यानपावर र सेभेन सिज म्यानपावर कम्पनीले नेपाली कामदार पठाएका हुन् । 

कम्पनीले कामदारलाई २ हजार दिराम मासिक तलब दिने गरी कामदार लगेको थियो । ‘नयाँ लटका कामदार जूनमा आएका हौं । गत डिसेम्बरादेखि मात्रै काम पायौं । तलब दिएकै छैन,’ भण्डारीले भने, ‘कम्पनीले गत जून ९ देखि तलब दिने सम्झौता गरेको थियो ।’ पीडितहरू यूएई पुगेको ५ महिना बित्दा पनि काम र तलब नदिएपछि दूतावास पुगेका हुन् । ६ जनालाई तलब माग्दा गोरखाका सरोज अर्याल, काठमाडौंका समीरकुमार कार्की, दार्चुलाका पदमसिंह भण्डारी, डडेलधुराका सागर सार्की, भक्तपुरका नवीन खड्का, काठमाडौंका रुपेन्द्र थापा नेपाल फर्काइए । 

आर्थिक समस्याले दैनिक जीवनयापनमा समेत कठिनाइ परेको पीडित सुरक्षागार्डले बताएका छन् । ‘पैसा नभएर गुणस्तरहीन खाना खाइरहेका छौं । पैसाभन्दा रोग कमाइरहेका छौं,’ उनीहरूले भने, ‘शेखको कम्पनी भनेर हामीलाई डर देखाइन्छ । हामीमध्ये कति जना साथी डरले बोल्न सकिरहेका छैनन् । कति जना तातोपानी र खबुस खाएर काम गरिराखेका छन् । बिरामी पर्दा उपचार गर्न साथीभाइसँग ऋण खोज्नुपर्छ ।’ पीडित कामदारले दूतावासमा उजुरी दिएदेखि नै समस्या समाधान गर्न प्रयास जारी राखेको नेपाली दूतावासले वैदेशिक रोजगार विभागलाई जानकारी दिएको छ । पीडित कामदारका आफन्तले यूएईमा बिचल्ली परेकालाई उद्धार गर्न उजुरी हालेका छन् । ‘काम दिने कम्पनीको लापरबाहीले नेपाली समस्यामा परेका हुन्,’ कामदार पठाउनेमध्ये एक डीडी म्यानपावरका सञ्चालक देवेन्द्र बजगाईंले कान्तिपुरलाई भने, ‘उहाँहरूको उद्धारका लागि पहल भइरहेको छ ।

दूतावास र कम्पनीसँग कुरा भइरहेको छ । कम्पनीले एकपछि अर्को भाका सार्दै गइरहेको छ ।’ तलब नपाएका पीडितलाई कम्पनीले मार्च १५ भित्र तलब भुक्तानी गर्ने आश्वासन दिएको छ ।

बेलायतमा नेपाली युवकको हत्या
लन्डन (कास)– बेलायतको अल्डरसटमा शुक्रबार साँझ एक नेपाली युवकको हत्या भएको छ । 
नेपालीको बाक्लो बस्ती रहेको अल्डरसट भिक्टोरिया रोडस्थित घरमा बस्ने अन्दाजी ४० वर्षीया विधवा सुकमाया तामाङले आफ्नो घर आएका २५ वर्षीय युवकलाई छुरा हानी हत्या गरेको आरोप छ । चितवन नारायणगढ घर भएकी ती महिला हत्यापछि फरार भएकी छन् ।

प्रहरीले घटनास्थल वरपर प्रवेश निषेध गरेकाले विस्तृत विवरण आइसकेको छैन । सुकमाया दुई छोरा र दुई छोरीकी आमा हुन् । उनको स्वास्थ्य स्थितिसमेत सामान्य रहेको उनलाई चिन्नेहरू बताउँछन् । ती महिलाले हत्या गरेपछि एउटा नोट लेख्दै आफूलाई बलात्कार गर्न खोजेपछि छुरा प्रहार गरेको जनाएको स्थानीय महिला समाजसेवी एवं एनआरएनए यूके आईसीसी सदस्य सुष्मा राईले बताइन् । 

सप्ताहन्त सुरु हुने साँझ अबेरसम्म चहलपहल हुने अल्डरसट क्षेत्रलाई हत्याको घटनाले स्तब्ध बनाएको छ । 

प्रकाशित : फाल्गुन २९, २०७३ ०७:४०
पूरा पढ्नुहोस्
प्रतिक्रिया
पठाउनुहोस्