साउदीमा जेल बसेर फर्किएकाले प्रधानमन्त्रीलाई सोधे, ‘हामीलाई न्याय कसले दिन्छ ?’

होम कार्की

काठमाडौं — हत्या अभियोगमा ७ बर्ष साउदी अरबको जेद्दाको जेलमा बसेर काठमाडौं आइपुगेका १० जना नेपालीले प्रधानमन्त्री पुष्पकमल दाहाललाई भेटेर आफूहरुलाई न्याय र क्षतिपुर्ति दिलाउन अनुरोध गरेका छन् ।

‘नेपाल सरकारले वेवास्ता गरिदिँदा हामी अनाहकमा ७ बर्ष जेल बस्नुपर्‍यो,’ विराटनगर-५ का ३२ वर्षीय भीम चिमारियाले दाहाललाई भने, ‘साउदीमा रहेको नेपाली दुताबासले बेलैमा महत्वका साथ हाम्रो मुद्दा हेरिदिएको भए तीन महिनाभन्दा बढी बस्न पर्दैन्थ्यो । दुताबासले नहेरिदिएको कारण हामी ७ बर्षसम्म बस्नुपर्‍यो ।’

साउदी प्रहरीले भारतीय नागरीक मारिएको मुद्दामा समातेर हत्या अभियोग लगाएको थियो । प्रहरीले लगाएको हत्याको अभियोग प्रमाणीत हुन नसकेपछि आफूहरु स्वदेश फिरेको उनीहरुले बताए । चिमारियासँगै अरु ९ पीडितहरु प्रधानमन्त्री निवास बालुवाटार पुगेका थिए । जसमा सुनसरीका चक्रबहादुर गुरुङ, नवलपरासीका कृष्णबहादुर दमाई, भोजपुरका श्रीकुमार राई, ओखलढुंगाका वीरबहादुर बुढाथोकी, झापाका दीपेन्द्र शेर्मा, नुवाकोटका रामबहादुर तामाङ, तनहुँका केशबहादुर नेपाली, रुपन्द्रेहीका भक्तबहादुर दर्जी र रसुवाका सोमबहादुर तामाङ थिए । ७ बर्ष जेल बसेर उनीहरु गत डिसेम्बर १८ तारिख काठमाडौं आइपुगेका थिए ।

पीडित श्रीकुमारले आफूहरु दोहोरो अन्यायमा परेको प्रधानमन्त्री दाहाललाई बताए । ‘पहिलो त हामीलाई लगाएको हत्या अभियोग प्रमाणित हुन सकेन । मृतकको शबमा भेटिएको रगत र फिंगरप्रिन्ट हामी कसैको मिलेन,’ उनले भने, ‘दोस्रो, हत्या नगरे पनि हामीले अदालतले सुनाएको सजाय भुक्तान भएको बर्षौ बितेपछि मात्रै स्वदेश फिर्न पायौं ।’

अदालतले दीपेन्द्र, भीम र श्रीकुमारलाई ५ वर्ष, रामबहादुर र वीरबहादुरलाई ४ वर्ष, केशबहादुर र चक्रबहादुरलाई ३ वर्ष, भक्तबहादुर, सोमबहादुर र कृष्णबहादुरलाई २ वर्ष फैसला सुनाएको थियो । यो फैसला आउँदा उनीहरू जेल बसेको ५ वर्ष भइसकेको थियो । ‘जसलाई जति वर्ष सुनाइए पनि सबै ७ वर्षसम्म बस्नुपर्‍यो,’ भक्तले भने, ‘अदालतले कुन मुद्दामा यो सजाय सुनाएको हो हामीलाई थाहा भएन ।’

उनीहरुले आफूसँगै पक्राउ भई जेलमै मृत्यु भएका झापाका उमेश श्रेष्ठको शब खोजी पीडित परिवारलाई उपलब्ध गराईदिन पनि माग गरे । ‘हामी त बाँचेर फर्कियौ । हाम्रा साथी उमेशको जेलमै मृत्यु भयो । उसको शब कहाँ छ ?’ भीमले भने, ‘उनको परिवारलाई शब दिलाइदिनुपर्‍यो ।’ पीडितहरुले आफ्नो बेवस्ता गर्ने साउदीका लागि नेपाली राजदुत र कर्मचारीहरु माथि कारबाही गर्न समेत माग गरेका थिए । ‘पछिल्लो समय जानुभएका रेवतीरमण पौडेल र मनोहरी दंगाल हाम्रा लागि भगवान बनेर जानुभएछ,’ भक्तले भने, ‘त्यसअघि गएका कसैले हाम्रो बिषयमा ध्यान दिएनन् ।’

उनीहरुले यस घटनालाई नेपाल सरकारले पाठको रुपमा लिनुपर्ने बताउदै आफुहरुले ७ बर्षसम्म अनाहकमा बस्नुपरेकोले क्षतिपुर्ति दिनुपर्ने माग गरेका थिए । ‘हामी र हाम्रा परिवारले ठूलो मानसीक यातना सहनुपर्‍यो । यसको क्षतिपुर्ति कसले दिन्छ ? साउदीसँग हाम्रा बारे कुरा हुन्छ कि हुँदैन ? यही बारे कुरा गर्न आएका हौ,’ चक्रले प्रधानमन्त्रीलाई सोधे, ‘हामी तपाईबाट न्याय चाहन्छौं ।’ प्रधानमन्त्री दाहालले सरकारबाट सानत्वना स्वरुप राहत दिइने प्रतिबद्धता जनाए । ‘तपाईहरु ठूलो पीडा सहेर जिबितै रुपले सकुशल यहाँ आइपुग्नुभयो । तपाईहरु पनि मृत्युको मुखमा परेर निस्कनुभएछ । एक जनाको शबलाई स्वदेश ल्याउन सरकारले पहल लिनेछ’, उनले भने, ‘सरकारको तर्फबाट पहल गरेर तपाईहरुलाई क्षतिपुर्ति दिलाइनेछ ।’ उनले यस घटनालाई पाठको रुपमा लिदै समीक्षाको बिषय भएको भन्दै दुताबासबाट पनि रिपोर्ट माग्ने बताए । ‘बिदेशमा भएका नेपालीलाई संरक्षण गर्ने दायित्व सरकारको हो । यो बिषयमा हामी कुटनीतिक माध्यमबाट साउदी सरकारसँग पनि कुरा गर्नेछौं’, उनले भने ।

प्रकाशित : माघ १८, २०७३ १८:३८
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

कान्तिपुर हिरो हाफ म्याराथन विजेतालाई स्कुटर

कान्तिपुर संवाददाता

काठमाडौं — सातौं कान्तिपुर–हिरो हाफ म्याराथनमा महिला र पुरुष दुवैका विजेताले ५० हजार रुपैयाँसहित स्कुटर पाउने भएका छन् । छैटौं संस्करण विजेताले ५०–५० हजार मात्र पाएका थिए ।

सातौं संस्करण फागुन ७ मा हुने मंगलबार पत्रकार सम्मेलनमार्फत् आयोजक कान्तिपुर पब्लिकेशन्सले जनाएको छ । यसपालि पनि २१ किलोमिटरको हाफ म्याराथन, ह्विलचेयर (३ किमि) र कर्पोरेट–मिडिया (५ किमि) को दौड समावेश गरिएको छ ।

‘तीन हजार खेलाडी सहभागी हुने अपेक्षा गरिएको छ,’ कान्तिपुरका सहायक महाप्रबन्धक महेश स्वाँरले भने, ‘अर्को वर्ष पब्लिकेशन्सको २५ औं वार्षिकोत्सव मनाउँदै छौं र त्यसबेला पुरस्कार राशि पनि वृद्धि गरेर हाफ म्याराथनलाई दक्षिण एसियाली स्तरको बनाउने छौं ।’ कान्तिपुरले वार्षिकोत्सवका अवसरमा २०६७ सालबाट सुरु गरेको हाफ म्याराथन बर्सेनि हुँदै आएको छ ।

‘गतवर्ष कोर्स रेकर्ड बनाउनेका लागि राखिएको स्कुटर पुरस्कार फिर्ता लानुपर्‍यो । त्यसबेला नै स्कुटर कुनै खेलाडीलाई दिन पाए हुन्थ्यो भन्ने लागेको थियो । त्यसैले यसपालि महिला र पुरुष विजेतालाई हिरो ड्यास स्कुटर दिन लागिएको हो,’ नेपाल जनरल मार्केटिङकी शीतल दाहालले बताइन् । महिला र पुरुषलाई समान पुरस्कार राखिएको छ । 

उपविजेताले ३० हजार र तेस्रो हुनेले २० हजार रुपैयाँसहित मोबाइल पनि पाउने छन् । चौथोले १० हजार, पाँचौंले ५ हजार र छैटौं स्थानमा रहनेले ३ हजार पाउने छन् ।

ह्विलचेयर दौडमा पुरस्कार दोब्बर बनाइएको छ । यसमा महिला र पुरुष दुवैमा पहिलो हुनेले २० हजार, दोस्रोले १० हजार र तेस्राले ५ हजार प्राप्त गर्नेछन् । अधिकृत वा सोभन्दा माथिल्लो पदका कर्मचारीमा मात्र सहभागी हुन पाउने कर्पोरेट–मिडियाका विजेताले काठमाडौं–सिंगापुर–काठमाडौं, दोस्रोले काठमाडौं–पोखरा–काठमाडौं र तेस्राले माउन्टेन फ्लाइटको टिकट पाउने छन् । माघ १५ देखि नै नाम दर्ता सुरु भइसकेको र यो फागुन १ सम्म चल्ने जनाइएको छ ।

हाफ म्याराथनमा राष्ट्रिय कीर्तिमान बनाउने धावकलाई प्रोत्साहनस्वरुप २५ हजार दिइने बताइएको छ । ‘निर्माण भइरहेका र विभिन्न समस्याका कारण यसपालि दौडको कोर्स पनि परिवर्तन गरिएको छ,’ कान्तिपुर–हिरो हाफ म्याराथनका कोर्स निर्देशक सुशील नरसिह राणाले बताए ।

कान्तिपुर पब्लिकेशन्सको थापाथलीस्थित सेन्ट्रल बिजनेस पार्कबाट दौड सुरु हुनेछ । त्यसपछि माइतीघर, बबरमहल, बिजुलीबजार, नयाँ बानेश्वर, तीनकुने, कोटेश्वर, जडिबुटी, गठ्ठाघर, सानोठिमी, भक्तपुरको सल्लाघारी चोक हँुदै कटुन्जे नजिक पुगी फर्केर सल्लाघारी चोक, ठिमी, गठ्ठाघर, जडिबुटी, कोटेश्वर, तीनकुने, नयाँ बानेश्वर, बिजुलीबजार, बबरमहल, माइतीघर हुँदै सेन्ट्रल बिजेनस पार्कमा आएर दौड टुंगिनेछ ।

प्रकाशित : माघ १८, २०७३ १८:३८
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT