आमनिर्वाचन घोषणा संसद्द्वारा पारित
लन्डन — बेलायती प्रधानमन्त्री टेरेजा मेले आगामी जुन ८ मा आमनिर्वाचन गर्न गरेको प्रस्तावलाई संसद्ले पारित गरेको छ । प्रधानमन्त्री मेले तीन वर्षको कार्यकाल बाँकी छँदै आकस्मिक रूपमा मंगलबार आमनिर्वाचन गर्ने घोषणा गरेकी थिइन् । युरोपियन युनियनबाट अलग हुने ब्रेक्जिट वार्तामा आफ्नो स्थितिलाई मजबुत बनाउने उद्देश्यले आमनिर्वाचन गराउन लागेको मेले बताएकी छन् ।
प्रधानमन्त्री मेले संसद्मा राखेको आमनिर्वाचन घोषणासम्बन्धी प्रस्ताव ५ सय २२ मतले पारित भएको हो । संसद्को ६ सय ५० सिटमा यो प्रस्ताव पारित गर्न दुई तिहाइ मत आवश्यक पर्थ्यो । प्रस्तावको विपक्षमा १३ मत परेको छ ।
यसअघि समयअगावै निर्वाचन नगराउने धारणा राख्दै आएकी मेले मंगलबार अकस्मात् रूपमा निर्वाचन गराउने घोषणा गरेकी हुन् । यो निर्वाचनले ब्रेक्जिट वार्तामा ढिलाइ हुनेछ । प्रधानमन्त्री मे र युरोपेली आयोगले ब्रेक्जिट वार्ता निर्वाचनपछि सुरु हुने बताएका छन् ।
प्रकाशित : वैशाख ७, २०७४ ०७:३२