प्रतीक्षित बलिउड फिल्म

सुशील पौडेल

बलिउडका लागि २०१६ मध्यम रह्यो । ‘पिंक’, ‘उड्ता पञ्जाब’, ‘नीरजा’, ‘मदारी’, ‘सरबजीत’ जस्ता फिल्मले बलिउडको साख जोगाए भने ‘एयरलिफ्ट’, ‘फ्यान’, ‘डियर जिन्दगी’, ‘एमएस धोनी : द अनटोल्ड स्टोरी’, ‘सुल्तान’ जस्ता फिल्मले बक्सअफिसलाई जगाइरहे ।

बलिउडका लागि वर्ष २०१७ पनि केही फिल्मका कारण खास हुने अनुमान गरिएको छ । 

शाहरूख खान पहिलो पटक निर्देशक इम्तियाज अलिसँग सहकार्य गर्दैछन्, फिल्म ‘द रिंग’ मा । फिल्ममा शाहरुखको जोडी ‘रब ने बनादी जोडी’ की अनुष्का शर्मासँग हुनेछ । रोमान्टिक ड्रामा भनिएको यस फिल्मलाई यतिबेलादेखि नै सलमान खानले प्रोमोट गरिदिएका छन् । कुनै बेला जानी दुश्मन मानिने शाहरुख र सलमानको नजिकिँदो सम्बन्धले पनि ‘द रिंग’ लाई प्रतीक्षित बनाएको छ ।
त्यसो त शाहरुखकै अर्को फिल्म ‘रइस’ पनि २०१७ मै रिलिज हुँदैछ । ट्रेलरले यतिबेला फिल्मप्रति अपेक्षा ह्वात्तै बढाएको छ । जनवरी २५ मा रिलिज हुने यसै फिल्मबाट शाहरुखको नयाँ वर्षको भविष्य पनि निर्धारण गर्नेछ ।
बलिउडमा बक्सअफिस कलेक्सनमा तीन खान आमिर, शाहरुख र सलमानबीच तीव्र प्रतिस्पर्धा चलिरहन्छ । वर्षान्तमा रिलिज आमिरको ‘दंगल’ ले यतिबेला व्यापारमा बाजी मारिरहँदा सलमान फेरि ‘टाइगर जिन्दा है’ भन्दै एक्सन अवतारमा आउन तम्तयार छन् । यसपटक उनी कबिर खानसँग नभई अली अब्बास जफरसँग वर्षको अन्त्यमा आउँदैछन् । उक्त फिल्म ‘एक था टाइगर’ कै सिक्वेल भएकाले पनि बिगेस्ट एक्सन फिल्म बन्ने अपेक्षा गरिएको छ ।
अक्षय कुमारलाई बक्सअफिसका सदाबहार नायक मानिन्छ । उनका प्राय: फिल्म सय करोड क्लबमा पुगिरहेका बेला तीन वर्षअघि राष्ट्रिय अवार्ड नै जितेको ‘जोली एलएलबी’ को सिक्वेलमा लिड रोलसहित देखा पर्दैछन् । फेब्रुअरी १० मा आउन लागेको फिल्ममा अक्षयलाई हुमा कुरेसीले साथ दिएकी छन् ।
विवाहपछि फेरि चम्केका नायक शाहिद कपुरको ‘रंगुन’ पनि अर्को प्रतीक्षित फिल्म मानिएको छ । विशाल भारद्वाजको पिरियड रोमान्स फिल्ममा शाहिदलाई कंगना रनौत र सैफअलि खानले साथ दिएका छन् । दोस्रो विश्वयुद्धको कथा भन्ने यस फिल्म पनि फेब्रुअरीको तेस्रो साता रिलिज हुँदैछ ।
यस वर्ष ‘डियर जिन्दगी’ र ‘उड्ता पञ्जाब’ बाट आलिया भट्ट झन् शानदार एक्टरमा दरिएकी छन् । उनै आलियाको डेब्यु फिल्म ‘स्टुडेन्ट अफ दि इयर’ को स्टार बरुण धवनसँग नयाँ फिल्म आउँदैछ, ‘बद्रीनाथकी दुल्हनियाँ’ । यसअघिको सफल फिल्म ‘हम्प्टी शर्माकी दुल्हनियाँ’ ले राम्रो चर्चा पाएकाले पनि सिक्वेल फिल्म र कास्टका कारण प्रतीक्षित बनेको हो ।
सलमानकै निर्देशक कवीर खानसँगको ‘ट्युबलाइट’ वर्ष २०१७ को अर्को अपेक्षा गरिएको फिल्म हो । जुन फिल्ममा सलमान चाइनिज एक्टर जुजुसँग स्क्रिन सेयर गरेका छन् भने फिल्मले ५० वर्षअघिको कथा भन्नेछ । फिल्म इदमा रिलिज हुँदैछ ।
सञ्जयलीला भन्साली पिरियड रोमान्टिक ड्रामाका लागि पर्फेक्ट मानिन्छन् । उनले फेरि एकपटक ‘राम–लीला’ र ‘बाजिराव मस्तानी’ कै जोडी दीपिका पादुकोण र रनवीर सिंहलाई लिएर ‘पद्मावती’ मा धमाका मच्चाउने ठानिएको छ । यसपटक भन्सालीले बिग बजेट फिल्ममा शाहिद कपुरलाई पनि समेटेका छन् । फिल्म नोभेम्बरमा रिलिज हुनेछ ।
र, वर्षको सबैभन्दा प्रतीक्षित फिल्म भने ‘बाहुबली : द कन्क्लुजन’ नै हुनेछ । यसअघि ‘बाहुबली : द बिगिनिङ’ ले पाएको तारिफ र सफलताले यसको सिक्वेललाई अत्यधिक प्रतीक्षित बनाइदिएको छ । फिल्मको सम्भावित क्लाइमेक्सको ६ मिनेटको फुटेज अनलाइन लिक भएपछि फिल्मप्रतिको चासो झनै बढेर गएको छ ।
त्यसैगरी पछिल्लो समय सफलता चाख्न नसकिरहेका रणवीर कपुर वर्ष २०१७ मा ‘जग्गा जासुस’ लिएर आउँदैछन् । उनको अपोजिटमा कट्रिना कैफ रहेकाले पनि फिल्मप्रति दर्शक चासो बढी छ । आफ्नो हराइरहेको बाबुको खोजीमा जासुसी शैलीमा निस्केका रणवीरले फिल्ममा दिने कमेडीले दर्शक रिझाउने ठानिएको छ ।
त्यसबाहेक रजनीकान्तको ‘रोबोट २’, ऋतिक रोशनको ‘काबिल’ र सलमानकै ‘दबंग ३’ पनि स्टारकास्टका कारण प्रतीक्षित हुनेछन् । 

 

प्रकाशित : पुस १५, २०७३ ०९:४८
प्रतिक्रिया
पठाउनुहोस्

नेपाली एप्सको ग्लोबल मार्केट

नेपालीले बनाएका मोबाइल र वेबबेस एप्लिकेसनहरु अहिले विश्व बजारमा पुग्न थालेका छन् । आईटी रिभोलुसनमा इनोभेसन नै सबैभन्दा शक्तिशाली चीज हो । यसमा भूगोलको खास मतलव छैन ।
विष्णु पोखरेल

फोटोलाई भिडियोमा ‘कन्भर्ट’ गर्ने र ‘सेयरिङ’ मा सहयोग गर्ने मोबाइल एप्स ‘पिकोभिको’ का प्रयोगकर्ता नेपाली मात्र छैनन् । यो एप्स नेपालीले नै बनाएका हुन् ।

यो एप्सको ‘पेड भर्सन’ त नेपालीले किन्दै किन्दैनन् भन्दा पनि हुन्छ । त्यसो भए यो एप कसले किनेर चलाइरहेका छन् त ? ‘विश्वभरका मानिसहरूले,’ पिकोभिकोका अमित अग्रवाल भन्छन्, ‘ग्लोबल मार्केटलाई टार्गेट गरिएकाले हाम्रा प्रयोगकर्ता कुनै जोग्राफीमा मात्र सीमित छैनन् ।’
पिकोभिकोको ‘फ्री भर्सन’ को एप्स नेपालीसहित विदेशीमाझ लोकप्रिय छ । अग्रवालको समूहले यसको ‘वेब भर्सन’ समेत विकास गरेको छ । यसबाट एकदमै कम प्राविधिक ज्ञान हुनेले फाइदा लिन सक्छन् । यसै कारण यो विश्वभरकै उपभोक्ताको रोजाइमा परेको छ । ‘हामीले फ्री भर्सनबाहेक प्रिमियम र प्रो भर्सन पनि बनाएका छौं,’ अग्रवालले भने, ‘प्रिमियमका लागि १२ र प्रोका लागि २८ अमेरिकी डलर तिर्नुपर्छ ।’ 
पिकोभिको मात्र होइन, नेपालीले बनाएका मोबाइल र वेबबेस एप्लिकेसनहरूसमेत अहिले विश्व बजारमा पुग्न थालेका छन् । पहिले नेपाली वा विदेशमा बस्ने नेपालीलाई मात्र लक्षित गरेर आईसीटी ‘प्रोडक्ट’ विकास गर्ने नेपाली युवा र व्यवसायीले अहिले विश्व बजारलाई हेरेर यस्तो उत्पादन ल्याउनसमेत थालेका छन् । ‘पहिले विदेशबाट आएको काम मात्र गर्ने चलन थियो, विस्तारै नेपाली र विदेशमा बस्ने नेपालीलाई टार्गेट गरेर आईसीटी प्रोडक्ट आउन थाले,’ अग्रवाल भन्छन्, ‘अब हामी विदेशमा बस्ने नेपाली मात्र होइन, ग्लोबल मार्केट हेरेर प्रोडक्ट ल्याउन थालेका छौ ।’ पिकोभिकोका प्रयोगकर्ता विदेशी धेरै भएको त्यसलाई विश्व बजारमा त्यस्तै खाले ‘प्रोडक्ट’ सँग प्रतिस्पर्धा गर्न सक्ने गरी विकास गर्दै लगिएको अग्रवाल बताउँछन् । 
केही वर्षअघि एफवानसफ्ट समूहले ‘क्यास अन एड’ मोबाइल एप्स बनाएको थियो । कल आउँदा प्रसारण भएको विज्ञापनका आधारमा पैसा पाइने यो एप्ससमेत विश्व बजारमा जान सक्ने खालको थियो । तर, नेपालमा भने यो सफल हुन सकेन । अहिले एफवानसफ्ट समूहले अरू मुलुकमा त्यही एप्सलाई त्यहाँका कम्पनीसँग मिलेर फरक नाममा चलाइरहेको छ । ‘अहिले क्यास अन एडकै प्लेटफर्ममा ल्याटिन अमेरिका र मलेसियामा एप्सहरू चलेका छन्,’ एफवान सफ्टका सुवास शर्माले भने, ‘त्यसबापत हामी रोयल्टी पाउँछौं ।’ 
अहिले इक्वेडरमा क्यास अन एडकै प्लेटफर्मबाट ‘चेकिया’ नामक एप्स चलिरहेको छ । झन्डै १ लाख हाराहारीमा डाउनलोड भइसकेको यो एप्सबाट ग्राहकले कल आउँदा बजेको विज्ञापनका आधारमा रकम पाउँछन् । त्यसबापत नेपाली डेभलपरले रोयल्टी कमाउँछन् । मलेसिया र कोलम्बियामा पनि यसको ‘लोकल भर्सन’ चाँडै लन्च हुँदैछ । ‘अहिले विस्तारै नेपाली आईसीटी डेभलपरमा पनि ग्लोबल मार्केट टार्गेट गरेर जानुपर्छ भन्ने सोच विकास हुँदै गएको छ,’ शर्मा भन्छन्, ‘त्यसले गर्दा नयाँखाले इनोभेसन भइरहेका छन् ।’ 
सूचना प्रविधिको विकासले विश्वको जुनसुकै कुनामा भएका इनोभेसनलाई समेत एउटै प्लेटफर्ममा ल्याउन सजिलो पारिदिएकाले समेत सजिलो भएको शर्माको तर्क छ । ‘अहिले प्लेस्टोरमा कुनै एप्स बनाएर राखिदियो भने त्यसको प्रयोग जहाँसुकैबाट हुन सक्छ,’ उनले भने, ‘नेपालीलाई मात्रै फोकस गरेका बाहेक एप्स धेरै विदेशीले समेत प्रयोग गरिरहेका छन् ।’
ग्लोबल मार्केटलाई फोकस गरेर अहिले नेपालभित्रै अनि बाहिरबाट समेत नेपालीले मोबाइल र वेबबेस एप्लिकेसनहरू बनाइरहेका छन् । ‘विदेशमा बस्ने आईसीटी डेभलपरले समेत धेरैखाले प्रोडक्ट ल्याएका छन्,’ अग्रवाल भन्छन्, ‘तर नेपालभित्रैबाट बनेका प्रोडक्टले समेत ग्लोबल मार्केटमा उपस्थिति देखाइसकेका छन् ।’ 
गुगल प्लेस्टोरमा एन्ड्रो नेपाल नामक कम्पनीले बनाएर राखेको ‘पासपोर्ट आईडी फोटो मेकर’ एप्स १ लाखभन्दा बढी डाउनलोड भइसकेको छ । यसको ‘रिभ्यु सेक्सन’ मा ‘रिभ्यु’ लेख्ने र ‘कमेन्ट’ गर्नेहरू पनि विदेशी धेरै छन् । यसले नेपालीले बनाएका एप्लिकेसनहरू विदेशीमाझ समेत लोकप्रिय हुँदै गएको देखाउँछ । विभिन्न मुलुकका पासपोर्ट र भिसाका लागि आवश्यक पर्ने फोटो एकदमै सजिलो तरिकाले यसमा बनाउन सकिन्छ । सबैले सजिलै प्रयोग गर्न सक्ने भएकाले नै यो एप्सको लोकप्रियता बढेको हो । 
कतिपय एप्लिकेसन ‘डेभलपर’ ले नेपालीलाई मात्र टार्गेट गरेर सुरु गरेका ‘प्रोडक्ट’ समेत विदेशीमाझ लोकप्रिय बनेका छन् । नेपालीलाई टार्गेट गरिए पनि विदेशीले मन पराएपछि नेपालीहरू ग्लोबल मार्केटलाई उपयुक्त हुने प्रोडक्ट बनाउन लागिपरेका छन् । विद्यार्थीलाई सहयोग पुग्ने गरी ‘ई–क्लास’ विकास गरेको ‘कुलल्याब्स’ ले पहिले नेपालीलाई मात्र टार्गेट गरेको थियो । तर, वेबसाइट र मोबाइल एप्लिकेसन प्लेटफर्महरूमा विदेशीले धेरै प्रयोग गरेको देखिएपछि यो समूहले समेत विदेशीलाई लक्षित गर्न थालेको छ । 
‘अहिले हाम्रा प्रयोगकर्तामध्ये ४० प्रतिशत मात्र नेपाली छन्, ६० प्रतिशत त विदेशी छन्,’ ‘कुलल्याब्स’ का अधिव पौडल भन्छन्, ‘विदेशीले धेरै मन पराएकाले हामी एप्स र वेबबेस क्लासलाई अझै ग्लोबल मार्केटसँग कम्पिटिटिभ बनाउँदै छौं ।’ कक्षा ८ देखि ब्याचलरसम्मका कोर्सलाई सहयोगी ‘ई–क्लास’ बनाएको ‘कुलल्याब्स’ ले यस्ता क्लासहरूको अडियो भिडियोसमेत बनाउने गरेको छ । 
केही वर्ष अघिसम्म धेरै नेपाली आईसीटी व्यवसायीहरू ‘डाटा इन्ट्री’, ‘कल सेन्टर’ जस्ता परम्परागत सेवामा सीमित थिए । विदेशी आईटी प्रोडक्टहरूलाई नेपाली ‘क्लाइन्ट’ सम्म ल्याउने काम गर्थे । तर, अहिले इनोभेटिभ ग्रुप बढ्दै गएको र सहजखाले प्लेटफर्म बढेकाले धेरैले नेपालमा डेभलप गरेका एप्लिकेसनहरूसमेत विश्व बजारमा पुर्‍याइरहेका छन् । ‘अहिले हामीले हेर्ने भनेकै ग्लोबल मार्केट हो,’ पिकोभिकोका अग्रवाल भन्छन्, ‘ग्लोबल मार्केट हेरेर काम गर्न सकियो भने हाम्रा प्रोडक्टले समेत स्थान पाउन सक्छन् ।’ 

प्रकाशित : पुस ८, २०७३ १०:३३
पूरा पढ्नुहोस्
प्रतिक्रिया
पठाउनुहोस्