योगेशको चेतावनी, ‘विपक्षी २ सय सांसद दही जमाएर बस्दैनन्’

कान्तिपुर संवाददाता

काठमाडौं — एमाले सचिव योगेश भट्टराईले संविधान संशोधन प्रस्ताव संसदमा जबरजस्ती टेबुल गरे प्रतिकार गर्ने चेतावनी दिएका छन् ।

संशोधनका कतिपय प्रावधान संविधान संविधान र कानुनविपरीत रहेको बताउँदै भट्टराईले जबरजस्ती नगर्न सरकारलाई आग्रह गरे । ‘संविधान बनाउने दल र संविधानको रक्षक भएकाले एमालेले संविधान र कानुनविपरीतका कुनै पनि विधेयक संसदमा लैजान दिंदैन,’ प्रेस चौतारी नेपालको अनलाइन प्रतिष्ठान शाखाले नयाँ बानेश्वरमा गरेको सडक संवादमा शनिबार उनले भने, ‘जबरजस्ती लैजान्छु भन्दैहुनुहन्छ भने संसदमा एमालेसहितका २ सय सांसदले दही जमाएर बस्दैनन् ।’

भट्टराईले संविधान संशोधन विधेयक संविधानको २७४ र २९६ विरुद्ध रहेको भन्दै असंवैधानिक प्रस्तावलाई संसदमा प्रवेश गराउनै नदिने चेतावनी दोहोर्‍याए । ‘संविधानसम्मत प्रस्ताव संसदमा छलफल हुन्छ,’ उनले भने, ‘संविधानको खिलाफमा भएका प्रस्ताव रोक्छौं ।’

भट्टराईले संशोधन विधेयकविरुद्ध अदालतमा समेत मुद्धा विचाराधिन रहेको भन्दै त्यसलाई थाति राख्नुनपर्नेमा जोड दिए । ‘अदालत र संसदको बीचमा शक्ति संघर्ष गराउन सरकार क्रियाशील छ,’ उनले भने ।

भट्टराईले पुस २२ गते काठमाडौंमा हुने विपक्षी दलको प्रदर्शनमा दुई लाख जनतालाई उतार्ने जानकारी दिए ।

प्रकाशित : पुस १६, २०७३ १७:२०
प्रतिक्रिया
पठाउनुहोस्

अटो मेकानिक्स व्यवसायीहरुको राष्ट्रिय भेला सुरु

सवारी दुर्घटना रोक्न अटो मेकानिक्सहरुको महत्वपूर्ण भूमिका हुने मन्त्री थानीको भनाइ
प्रकाश अधिकारी

सुर्खेत — मुलुकभरका अटो मेकानिक्स व्यवसायीहरुको राष्ट्रिय भेला वीरेन्द्रनगरमा सुरु भएको छ । भेलाले नयाँ नेतृत्व चयन गर्ने भएकाले सबै जिल्लाबाट नेपाल अटो मेकानिक्स व्यवसायी संघसँग आबद्ध ७० भन्दा बढी जिल्लाका प्रतिनिधिहरु सुर्खेतमा भेला भएका छन् ।


 
संघको नवौं साधारणसभा तथा चौथो अधिवेशनको शनिबार गरिबी निवारण तथा सहकारी मन्त्री हृदयराम थानीले उद्‍घाटन गरे । उनले सवारी दुर्घटना रोक्न अटो मेकानिक्सहरुको भूमिका महत्वपूर्ण भएकाले आफूलाई जिम्मेवारीबोध गर्न आग्रह गरे । हरेक सहरमा अटो लेन र अटो भिलेजको माग राखिरहेको संघले राष्ट्रिय अर्थतन्त्रमा आफूहरुको ३० प्रतिशत योगदान पुर्‍याएको दाबी गरेको छ । ‘सवारीसाधन राम्ररी चेकजाँच गरेर मात्र चलाउनुस् । तपाईंहरुको माग राज्यले ढिलोचाँडो पूरा गर्छ’ मन्त्री थानीले ‘तपाईंहरु आफ्नो क्षेत्रको जिम्मेवारी कुशलतापूर्वक वहन गर्नुभयो भने राज्यले माग पूरा नगरी सुखै छैन ।’

पदमा वहाल भएदेखि आफ्नो मन्त्रालय भूमिकाविहीन भएको सार्वजनिक गुनासो गर्दै आएका सहकारी तथा गरिबी निवारणमन्त्री हृदयराम थानीले शनिबार अटो व्यवसायीहरुको राष्ट्रिय भेलामा समेत उही कुरा दोहोर्‍याए । उनले क्याबिनेटदेखि मिडिया र सार्वजनिक मञ्चहरुमा मन्त्रालयलाई कामकाजी बनाउन बहस चलाइरहेको बताए । ‘गरिबी निवारणसँग सम्बन्धित सबै कार्यक्रमहरु छरिएर रहेका छन् । तीनलाई यसै मन्त्रालय मातहत ल्याउन वैधानिक लडाइँ लडिरहेको छु’ थानीले भने, मैले बारम्बार भनिरहेको छु । कि मन्त्रालय विघटन गरौं । नत्र छरिएका ती सबै एकै ठाउँमा ल्याएर मन्त्रालयलाई कामकाजी बनाऔं ।’

उनले प्रधानमन्त्री कार्यालयद्वारा सञ्चालित गरिबी निवारण कोष, अर्थ मन्त्रालयद्वारा सञ्चालित युवा स्वरोजगार कोष र संघीय मामिला तथा स्थानीय विकास मन्त्रालयद्वारा सञ्चालित गरिबसँग विश्वेश्वर कार्यक्रम गरिबी निवारण तथा सहकारी मन्त्रालय मातहत ल्याउनुपर्नेमा जोड दिए । पुँजी परिचालनमार्फत् गरिबी निवारण गर्न ती कार्यक्रम जरुरी भएको उनको भनाइ थियो ।

 

प्रकाशित : पुस १६, २०७३ १७:१३
पूरा पढ्नुहोस्
प्रतिक्रिया
पठाउनुहोस्