नौ गाउँले जुटे विद्यालय बनाउन

सडक सञ्जालले नछोएको री गाउँ गाविसका सबै वडाका अभिभावक यतिखेर पिठो बोकेर डेढ दिनको पैदल हिँडेर छिमेकी गाविस गुम्दीको सातदोबाटोस्थित उच्च माध्यमिक विद्यालयको चौरमा भेला भएका छन् । गुम्दीसँग सिमाना जोडिएका वडाका अभिभावकलाई गुम्दी पुग्न सहजै छ । वडा ९ किचेतका बासिन्दालाई आउन जान ४ दिन लाग्छ । उनीहरू खानपिनका सामान बोकेर री गाउँको उच्च माध्यमिक विद्यालयसहित विभिन्न तहका ८ वटा विद्यालय निर्माण गर्ने जस्तापाता र फलामे ट्रस्ट ढुवानी गर्न गुम्दीसम्म उर्लिएका हुन् ।

भूकम्पका कारण उपयुक्त रूपले पठनपाठन गर्ने थलो नभएकै कारण री गाउँका सबै तहमा अध्ययन गर्ने विद्यार्थी अलपत्र परेका थिए । गत वैशाखदेखि बन्द भएका विद्यालयहरू ज्ोठ महिना अस्थायी टहरा निर्माणमै समय बित्यो । कतिपय विद्यालयमा शिक्षक नगएरै विद्यार्थी चौरमा खेल्दै फर्कंदै गरे ।
 ‘बवालबालिकाहरू अभिभावकसँगै विस्थापित शिविरमा बस्न थालेपछि पठनपाठन अवरुद्ध भएको री गाउँ ३ कुव्बलका अभिभावक गोरेबहादुर तामाङले बताए ।

‘विद्यालयहरू तत्काल सुचारु गर्न री गाउँ उच्च माध्यमिक विद्यालय, पासाङचोक निम्न माध्यमिक विद्यालय, लालीगुराँस प्राथमिक विद्यालय, बुद्ध प्राथमिक विद्यालय, हिमालय प्राथमिक विद्यालय, बुद्धज्योति प्राथमिक विद्यालय, सितलादेवी प्राथमिक विद्यालय र देउराली प्राथमिक विद्यालयका ३८ वटा कक्षा कोठा तत्काल निर्माण गर्नुपर्ने अवस्था छ,’ जिल्लाको उत्तरी भेकमा अनुगमनपछि फर्केका जिल्ला शिक्षा अधिकारी गणेशप्रसाद ढकालले भने । उत्तरी भेकका ८ वटा विद्यालयमा १५ सय घरधुरीका १ हजार ९ सय विद्यार्थीहरू अध्ययन गर्छन् ।

जिल्ला शिक्षा कार्यालयसँग अनुमति लिएर जिल्लाका विभिन्न भेकका ३ सय वटा विद्यालयका अस्थायी सिकाइ केन्द्रको निर्माण गरी सकेको ट्रेकिङ एजेन्सिज एसोसियसन अफ नेपाल (टान) ले री गाउँका ८ वटै विद्यालयमा फलामे ट्र्रस निर्माण गर्ने जिम्मा लिएको छ । टानले गुम्दी गाविससम्म सडकबाट ढुवानी गरेर पुर्‍याएको सामान लिन री गाउँका सम्पूर्ण अभिभावकलाई परिचालन गरेको छ ।

टानलाई ताइवानको आइक्वान ताओ नामक संस्थाले निर्माण सामग्री, ढुवानी र जडान खर्च उपलब्ध गराएको टानका अध्यक्ष रमेश धमलाले बताए ।

गाउँमा विद्यालय निर्माणसंगै ढुवानी गरेवापत अविभावकहरूले नगद रकमसमेत हात पार्ने छन् । गुम्दीवाट आआफना वस्तीमा जस्तापाता र पाइप ढुवानी गरे वापत प्रति केजी ८० रुपैयाका दरले ज्याला पाउने छन् । आकर्षक ज्याला भए पछि युवकहरू ६० देखि ६६ केजीसम्मका भारी वोकेर आफनामे वस्तीतिर लागेकाछन् ।