भाषा आयोगले पायो कार्यालय

कान्तिपुर संवाददाता

काठमाडौं — संविधानअनुसार गत भदौमा गठित भाषा आयोगले चार महिनापछि कार्यालय पाएको छ । काठमाडौं महानगरपालिका–३४, शंखमूल क्षेत्रको वाग्मती करिडोर मनहरा पुल नजिकै भाडाको भवनमा बुधबार आयोगको कार्यालय सरेको छ ।

यसअघि आयोग कार्यालय सिंहदरबार परिसरमा संस्कृति मन्त्रालयको छिँडीमा थियो । सरकारले भदौ २४ मा आयोगको अध्यक्षमा लवदेव अवस्थीलाई नियुक्त गरे पनि सात प्रदेशको प्रतिनिधित्व हुने गरी लामो समयसम्म सदस्य नियुक्त गर्न सकेको छैन ।

आयोगको आफ्नै कार्यालय व्यवस्थित भएपछि औपचारिक रूपमा काम अघि बढाउन सहज भएको अध्यक्ष अवस्थीले बताए । ‘आयोगको आफ्नै कार्यालय भएपछि काम गर्न सहज वातावरण तयार भएको छ,’ अध्यक्ष अवस्थीले भने, ‘यसबाट नेपालको संविधानले दिएको जिम्मेवारी पूरा गर्न सजिलो हुनेछ ।’ आयोगमा आवश्यक जनशक्ति निजामती सेवाका केही कर्मचारीहरू काजमा ल्याइएका छन् ।

आयोगले संविधानमा उल्लेख भएअनुसार सरकारी कामकाजको भाषाका रूपमा मान्यता पाउन पूरा गर्नुपर्ने आधारहरूको निर्धारण गरी सरकारसमक्ष भाषाको सिफारिस गर्नेछ ।

भाषाहरूको संरक्षण, संवद्र्धन र विकासका लागि अवलम्बन गर्नुपर्ने उपायको सरकारसमक्ष सिफारिस गर्ने, मातृभाषाहरूको विकासको स्तर मापन गरी शिक्षामा प्रयोगको सम्भाव्यताबारे सुझाव पेस गर्ने र भाषाहरूको अध्ययन, अनुसन्धान र अनुगमन गर्ने कार्य आयोगले गर्नेछ ।

गठन भएको पाँच वर्षभित्र आयोगले तोकिएका कार्य सम्पन्न गर्नुपर्ने संवैधानिक व्यवस्था छ भने अध्यक्ष र सदस्यहरूको पदावधि ६ वर्षको हुने प्रावधान छ ।

प्रकाशित : मंसिर २९, २०७३ १८:५६
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

कलेजो रोगमा नेपालबाटै डीएम

कलेजोमा डीएम गराउने नेपाल दक्षिणपूर्वी एसियामा भारतपछि दोस्रो
अतुल मिश्र

काठमाडौं — चिकित्सा विज्ञान राष्ट्रिय प्रतिष्ठान वीर अस्पतालले कलेजो रोगमा दुई जनालाई सबैभन्दा माथिल्लो तहको डाक्टरेट अफ मेडिसिन (हेपाटोलजी–कलेजो रोग विज्ञान) उपाधि प्रदान गरेको छ । कलेजोका विषयमा डाक्टरेट अफ मेडिसिन (डीएम) यसअघि दक्षिण पूर्वी एसियाका ११ मुलुकमध्ये भारतमा मात्रै पढाइ हुन्थ्यो । अब नेपाल यो स्तरको शिक्षा दिने दक्षिण पूर्वी एसियाको दोस्रो मुलुक बनेको छ ।


 
वीर अस्पताल कलेजो युनिटका प्रमुख एवं डीएम हेपाटोलजीका कोअर्डिनेटर प्रा.डा.अनिलकुमार मिश्रका अनुसार भारतमा पनि चार ठाउँमा मात्रै यसको अध्ययन हुने गरेको छ । 

प्रतिष्ठानबाट डा. विकास जैसी र डा.नियन्ता कार्कीले उपाधि पाएका हुन् । उनीहरूको परीक्षा भारतबाट आएका कलेजो विज्ञहरूले लिएका थिए । दुवै जनाले भारतको संस्थानमा गएर कलेजो प्रत्यारोपण फिजिसियनका रूपमा समेत विज्ञता हासिल गरेका छन् । ‘हालै मुलुकले कलेजो प्रत्यारोपणमा फडको मारेको छ । अब हाम्रै देशबाट उत्पादित हेपाटोलजीका डीएमहरूले यसमा सघाउन सक्नेछन्,’ डा. मिश्रले भने । 

वीर अस्पतालमा हेपाटोलजीमा डीएम उत्पादन हुनु कलेजो रोगको क्षेत्रमा अत्यन्त सकारात्मक परिवर्तन रहेको जनाउँदै मानव अंग प्रत्यारोपण केन्द्रका निर्देशक एवं वरिष्ठ प्रत्यारोपण शल्य चिकित्सक पुकारचन्द्र श्रेष्ठले भने, ‘हामीले अत्यन्त जटिल मानिएको कलेजो प्रत्यारोपण सुरु गर्‍यौं । योसँगै कलेजो क्षेत्रमा दक्ष जनशक्ति मुलुकमै उत्पादन हुन थाल्नु धेरै राम्रो परिवर्तन हो ।’
 
हाल वीरको लिभर युनिटमा १५ जना छन् भने त्यहाँ दुई ब्याच गरेर तीनजना डीएम हेपाटोलजीमा अध्ययनरत विद्यार्थी छन् । वीर अस्पतालका निर्देशक डा.भूपेन्द्र बस्नेतका अनुसार हाल वीरमा हेपाटोलजीसँगै ग्यास्ट्रो, कार्डियो, नेफ्रो, न्युरो, रेस्पिरेटरी, इन्डोक्राइन गरी सात विषयमा डीएम पढाइ हुन्छ । 

यस्तै युरोलजी, ग्यास्ट्रो, न्युरो र कार्डियोथारोसिक सर्जरी गरी चार विषयमा एमसीएचको पढाइसमेत हुन्छ ।

प्रकाशित : मंसिर २९, २०७३ १८:५३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT