ऐश्वर्याको निहुँमा विवाद

पूर्व मिस वल्र्ड ऐश्वर्याको प्राकृतिक रंगलाई फोटोसपबाट गोरो बनाइदिएको अडकल सुरु भएलगत्तै पाठकहरूले म्यागजिनविरुद्ध रंगभेदको आरोप लगाएका हुन् । ३७ वर्षीया सुन्दरीको छालालाई 'डिजिटल ब्लिच' गरिदिएको उनीहरूको दाबी गरेका छन् ।
'ब्राइड एन्ड प्रेजुडाइस' स्टारले यो महिना 'एले' म्यागजिनको भारतीय संस्करणको कभरमा शोभा बढाएकी छन् । तर, त्यसमा नीला आँखावाली अभिनेत्रीको छालाको रंग धेरै गोरो देखाइएको छ । म्यागजिनका भित्री फोटामा पनि उनलाई धेरै उज्यालो बनाइएको छ ।
त्यसैले, बलिउड सुन्दरी ऐश्वर्याका फ्यान रुष्ट छन् । उनीहरूले यसबारे म्यागजिनको अनलाइनमा प्रतिक्रिया दिँदै उसले रंगभेद गरेको आरोप समेत लगाएका छन् । 'मलाई रिस उठिरहेको छ,' एक जना फ्यानले लेखेका छन्, 'गोरो छालाचाहिँ सधैं फेसनमा हुने र कालो छालालाई आँखा बिझाउने जस्तो व्यवहार गरेको छ, पत्रिकाले ।'
म्यागजिनले गोरो छाला नभएका मोडललाई गोरो देखाएकामा विवादमा परेको यो पहिलो पटक होइन । गत सेप्टेम्बरमा अश्वेत अभिनेत्री गाबौरी सिडिबेको कम्प्लेक्सन गोरो बनाएर कभरमा छापेपछि विवाद भएको थियो । त्यस घटनामा म्यागजिनले 'प्रेसियस' स्टारको छालाको रंग अरू मोडलहरूको भन्दा बढी सेतो नबनाइदिएको दाबी गरेको थियो ।
फ्यानहरू रुष्ट भएर सुरु भएको यो विवादबारे म्यागजिन र ऐश्वर्याले कुनै प्रतिक्रिया दिएका छैनन् ।

प्रकाशित : पुस १४, २०६७ ०९:४३