सिंगो बस्ती पहिराको जोखिममा

वषर्ा सुरुलगत्तै घर नजिकैबाट पहिरो सुरु भएपछि गाउँले त्रसित भई सुरक्षित बास खोजीमा लागेका हुन् । सदरमुकाम म्याङलुङदेखि ३० किमि पश्चिमको फुलेकको ८ र ९ वडाका बासिन्दा डरले रातभर निदाउन नसकेको बताउँछन् ।
'पहिराले बारी हुँदै घरसमेत बगाउन आँटेको छ,' फुलेक- ९ चम्फुलाका यामबहादुरले भने, 'पहिराले लग्ने डरले रातभर सबै जागै बस्छौं ।' गाउँले सबै काम छाडेर पहिरो रोकाउने उपाए खोज्न लागिपरेका छन् ।
'दिनभर त बाहिरै हुन्छौं,' फुलेक- ९ चम्फुलाकी फूलकुमारी गुरुङले भनिन्, 'रात परेपछि पहिरोले बगाउला भन्ने डर लाग्छ ।' हल्का पानी पर्नसाथ पहिरो खस्ने गरेको उनले बताइन् । गाउँको पुछारमा रहेको मङसेवा खोलाबाट सुरु भएको पहिरो बीच गाउँ आइपुगेको छ । पहिरो आसपास सयौं मिटर टाढाका जमिन धाँजा फाटेका छन् । स्थानीय कर्णबहादुर गुरुङ पहिराले धेरैको उठिबास लगाउन आँटेको बताउँछन् ।
पहिरो रोकथामका लागि गाउँलेले रुखबिरुवा रोप्नेदेखि पानी तर्काउनेसम्म गरे, रोकिनुको सट्टा झन् बढेर आएको छ । पहिराले चम्फुलाका मित्रलाल राई, रामबहादुर गुरुङ, दुर्जमान राई, कर्णबहादुर राईलगायत ६ परिवारको जग्गा र घर बगाउन लागेको छ । पानी परेलगत्ततै पहिरो बग्न थाल्छ ।
वषर्ाको भेलसँगै गएको पहिराले खोलाको शिरबाट फुलेक गाविसका कृषकले लगेको जोरगुराँस सिंचाइ कुलो पनि बगाएको छ । कुलो बगेपछि फुलेकका २ सय ५० भन्दा बढी परिवार सिंचाइ सुविधाबाट वञ्चित छन् । कुलो बगाएपछि १ हजार ५ सय रोपनी खेत बाझै रहेको स्थानीय अमृत गौतमले बताए ।
'समयमै विचार नपुर्‍याए ठूलो दुर्घटना हुन सक्छ,' सार्वजनिक मावी फुलेकका प्रअ कमल खड्काले भने ।

प्रकाशित : असार ३०, २०६७ ०८:५०